مەملەكەت باسشىسىنىڭ تاپسىرماسى بويىنشا جاڭا سۋ كودەكسىنىڭ جوباسىنا تاسقىن جانە ەرىگەن قار سۋىنىڭ الدىن الۋ جانە قورعاۋ ءىس-شارالارى ەنگىزىلدى.
سۋ رەسۋرستارى جانە يرريگاسيا مينيسترلىگى، پارلامەنت ءماجىلىسىنىڭ دەپۋتاتتارى مەن ساراپشىلار قۇجاتتى پىسىقتاۋدى جالعاستىرۋدا، دەپ حابارلايدى aqshamnews.kz سالا مينيسترلىگىنە سىلتەمە جاساپ.
سۋ كودەكسىنىڭ جوباسىنا سايكەس، ەلدى مەكەندەر مەن نىسانداردى قورعاۋ ءۇشىن جەرگىلىكتى اتقارۋشى ورگاندار بوگەتتەر، ءموبيلدى قورشاۋلار، اينالما ارنالار مەن ۋاقىتشا سۋ قويمالارىن سالۋ جۇمىستارىن جۇرگىزۋى كەرەك. سونداي-اق، جەرگىلىكتى اتقارۋشى ورگاندار سۋ تاسقىنى مەن ەرىگەن سۋدان قورعاۋ ءۇشىن ورمان ەكپەلەرىن وتىرعىزۋدى جۇزەگە اسىرۋى ءتيىس.
ءوز كەزەگىندە، باسسەيندىك جوسپارلار ەلىمىزدەگى 8 سۋ شارۋاشىلىعى باسسەينىنىڭ ءارقايسىسىنا قاجەتتى ءىس-شارالاردى انىقتايدى.
سونداي-اق، جاڭا سۋ كودەكسىنىڭ جوباسى قۇرعاقشىلىققا قارسى ءىس-شارالاردى، سونىڭ ىشىندە جاۋىن-شاشىن مەن توپىراق ىلعالدىلىعىنىڭ دەڭگەيىن باقىلاۋدى، قۇرعاقشىلىق كەزەڭى ءۇشىن تاسقىن سۋدى جيناۋ مەن ساقتاۋ، سۋ ۇنەمدەيتىن تەحنولوگيالاردى ەنگىزۋدى جانە قۇرعاقشىلىققا ءتوزىمدى داقىلداردى پايدالانۋ ارقىلى اۋىل شارۋاشىلىعىن بەيىمدەۋدى كوزدەيدى.
«قۇجات مەملەكەتتىك ورگانداردىڭ سۋ تاسقىنى مەن قۇرعاقشىلىققا قارسى ءىس-قيمىل ماسەلەسىندەگى وكىلەتتىكتەرىن ناقتى ايقىندايدى. ەنگىزىلگەن تۇزەتۋلەر سۋ سەكتورىنىڭ كليماتتىڭ وزگەرۋىنە بەيىمدەلۋىنە، سۋدىڭ زياندى اسەرىنىڭ ءقاۋپىن ازايتۋعا جانە گيدروتەحنيكالىق قۇرىلىستاردىڭ قاۋىپسىزدىگىن ارتتىرۋعا جاعداي جاسايدى»، - دەدى سۋ رەسۋرستارى جانە يرريگاسيا مينيسترلىگىنىڭ سۋ ساياساتى دەپارتامەنتىنىڭ ديرەكتورى سەرىكجان بەكەتايەۆ.