كودەكس ازىرلەنىپ جاتىر
جاڭا سۋ كودەكسىندە سۋ رەسۋرستارىن سارقىلۋدان جانە لاستانۋدان قورعاۋعا باسا ءمان بەرىلەدى. بۇل تۋرالى سۋ كودەكسى جوباسىن قوعامدىق تالقىلاۋدا ايتىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«سۋ رەسۋرستارىنىڭ لاستانۋى مەن ءتيىمسىز پايدالانىلۋى، سۋ پايدالانۋدىڭ ەسكىرگەن تەحنولوگيالارى، سۋدىڭ شەكتەۋلى بولۋى مەن سارقىلۋ ءقاۋپى، ترانسشەكارالىق سۋدى بىرلەسىپ پايدالانۋ جانە قورعاۋ ماسەلەلەرى نەگىزگى پروبلەمالار بولىپ قالا بەرەدى. قولدانىستاعى سۋ كودەكسى نەگىزىنەن سۋ رەسۋرستارىن شارۋاشىلىقتا پايدالانۋعا باعىتتالعان، وندا سۋ اۋىل شارۋاشىلىعىندا ەكونوميكالىق پايدا تابۋ قۇرالى رەتىندە قاراستىرىلادى»، - دەدى سۋ رەسۋرستارى كوميتەتى سۋ قورىن پايدالانۋ جانە قورعاۋ سالاسىنداعى مەملەكەتتىك باقىلاۋ باسقارماسىنىڭ باسشىسى مارات يمانالييەۆ.
ازىرلەنىپ جاتقان جاڭا سۋ كودەكسى جوباسىندا ەكونوميكانىڭ بارلىق سالالارىندا سۋدى ۇنەمدەۋ قاعيداتتارىن بەكىتۋ ۇسىنىلادى.
«جاڭا سۋ كودەكسىنىڭ نەگىزگى ءمانى – سۋدىڭ قورشاعان ورتانىڭ نەگىزگى ەلەمەنتى ەكەنىن، ونىڭ ءومىر ءسۇرۋ ءۇشىن جانە ادامنىڭ ەكونوميكالىق قىزمەتىنىڭ بارلىق تۇرىندە قاجەتتىگىن بەكىتۋ. بۇل تۇرعىدا سۋدى سارقىلۋدان جانە لاستانۋدان قورعاۋ - سۋ رەسۋرستارىن باسقارۋدىڭ باستى ءتاسىلى بولادى. جوبادا باياندالعان تۇجىرىمدامالار نەگىزىندە ءبىرقاتار نەگىزگى پروبلەمالاردى شەشۋ جولدارى ۇسىنىلادى»، - دەدى م. يمانالييەۆ.
ايتا كەتەيىك، مەملەكەت باسشىسىنىڭ بيىلعى 8 اقپانداعى كەڭەيتىلگەن ۇكىمەت وتىرىسىنداعى تاپسىرماسىنا سايكەس جاڭا سۋ كودەكسى ازىرلەنىپ جاتىر.