مىنە، ماڭىزدى ساياسي ناۋقاندى ەلىمىز ابىرويمەن وتكىزدى. داۋىس بەرۋگە قۇقىعى بار ازاماتتارىمىزدىڭ 70 پايىزدان استامى ءوز تاڭداۋىن جاساعان رەفەرەندۋمعا وتاندىق جانە حالىقارالىق بايقاۋشىلار جوعارى باعاسىن بەرىپ جاتىر. جاڭارتىلعان كونستيتۋسيامىزدى داۋىس بەرۋشىلەردىڭ كوپشىلىگى قولدادى. وتە قۋانىشتىمىز.
پرەزيدەنتىمىز قاسىم-جومارت كەمەل ۇلى توقايەۆ رەفەرەندۋم ناتيجەلەرى بويىنشا حالىققا ۇندەۋ جاسادى. جاڭا قازاقستاندى قۇرۋ جولىندا قولداۋ ءبىلدىرىپ، اتسالىسىپ جاتقان بارشا حالىققا ريزاشىلىعىن بىلدىرگەن مەملەكەت باسشىسى، بۇل جۇمىستاردىڭ جاڭارۋدىڭ تەك باسى ەكەنىن ايتىپ، ءالى اتقارىلۋى ءتيىس تالاي ماسەلە بارىنا باسا نازار سالا كەلە: «ءبىز قوعامدىق جانە جەكە قۇندىلىقتار جۇيەسىن تۇبىرىمەن جاڭعىرتا ءبىلۋىمىز كەرەك. سوندا عانا بارلىق سالادا تۇبەگەيلى وزگەرىس جاساي الامىز.
جاڭا قازاقستاننىڭ ەڭ باستى بايلىعى – حالىق. ال، ەڭ نەگىزگى ماقساتى – ازاماتتاردىڭ باقىتتى ءومىر ءسۇرۋىن قامتاماسىز ەتۋ. ءاربىر ازاماتىمىز ساياسي وزگەرىستەر مەن ەكونوميكالىق ءوسىمنىڭ جەمىسىن كورۋى قاجەت. قۇرعاق ۋادە مەن بوس ءسوز ەشقايدا اپارمايدى. مەن ءۇشىن ناقتى ءىس پەن شىنايى وزگەرىس بارىنەن ماڭىزدى. بۇل ماقساتقا قول جەتكىزۋ ءۇشىن بار كۇش-جىگەرىمدى سالامىن»، – دەپ تۇيىندەدى.
ادىلەتتى قازاقستان قۇرۋدا، ۇلان-بايتاق جەرىمىزدى، ۇلتتىق قۇندىلىقتارىمىزدى ساقتاپ، بابالار اماناتىن كەلەر ۇرپاققا جەتكىزۋ ىسىندە اللا بىزگە جار بولسىن!