قۇجاتتاردى قابىلداۋ 1 تامىزدا اياقتالادى.
بۇگىنگى تاڭدا بالالاردى ءبىرىنشى سىنىپقا قابىلداۋعا 390 مىڭعا جۋىق ءوتىنىش ءتۇستى. ونىڭ ىشىندە بالالاردىڭ 70%-ى مەملەكەتتىك تىلدە وقۋدى تاڭدادى، دەپ حابارلايدى Almaty-akshamy.kz Ortcom.kz cىلتەمە جاساپ.
ءبىرىنشى سىنىپقا وتىنىشتەردى قابىلداۋ 1 ساۋىردە باستالعان بولاتىن. ال قۇجاتتاردى قابىلداۋ مەرزىمى 2022 جىلعى 1 تامىزدا اياقتالادى. ودان كەيىن مەكتەپتەرگە سىنىپتاردى قالىپتاستىرۋعا ساپالى دايىندىق جۇمىستارىن جۇرگىزۋگە جانە وقۋ ءۇردىسىن ۇيىمداستىرۋعا ۋاقىت بەرىلەدى.
«قۇجاتتاردى قابىلداۋ مەرزىمىنىڭ اياقتالۋىنا ساناۋلى كۇندەر قالدى. 1 ساۋىردەن باستاپ 4 اي بويى باق-تا دا، الەۋمەتتىك جەلىلەردە دە 1 تامىزعا دەيىن قۇجاتتاردى تاپسىرۋ قاجەتتىگى تۋرالى حابارلاپ كەلەمىز. ءالى ءوتىنىش بەرىپ ۇلگەرمەگەندەر 1 تامىزعا دەيىن قۇجات تاپسىرا الادى. ءقازىر كوپتەگەن مەملەكەتتىك ءبىلىم بەرۋ قىزمەتى ەلەكتروندى فورماتتا قولجەتىمدى، سول سەبەپتى egov.kz ۆەب-پورتالى ارقىلى ءوتىنىش جىبەرۋگە بولادى. سونىمەن قاتار اتا-انالاردىڭ ءوتىنىشى بويىنشا قۇجاتتاردى ءداستۇرلى قاعاز فورماتىندا دا تاپسىرۋ مۇمكىندىگى بار»، - دەپ ءتۇسىندىردى ق ر وقۋ-اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
بالالاردى قازاق سىنىپتارىنا قابىلداۋ بويىنشا جوعارى كورسەتكىش قىزىلوردا (89،7%)، باتىس قازاقستان (85،4%)، ماڭعىستاۋ (87،6%) جانە جامبىل وبلىستارىندا بايقالادى.
جاڭا وقۋ جىلىندا 405-410 مىڭعا جۋىق بالا 1-سىنىپقا بارادى دەپ كۇتىلىپ وتىر.