ءماجىلىس دەپۋتاتى دانيا ەسپايەۆا كونستيتۋسيالىق رەفورمالار جونىندەگى كوميسسيانىڭ بەسىنشى وتىرىسىندا اتا زاڭعا ۇسىنىلعان وزگەرىستەردىڭ كولەمى مەن تەرەڭدىگى تەك قانا جەكەلەگەن تۇزەتۋلەر اياسىندا قالمايتىنىن، كونستيتۋسيانىڭ جاڭا ءماتىنىن ازىرلەۋ قاجەتتىگىنە وبەكتيۆتى تۇردە الىپ كەلەتىنىن ايتتى.
ونىڭ سوزىنشە، باستاپقىداعى پارلامەنتتىك رەفورما تۋرالى باستاما، سونداي-اق قوعامدىق قاتىناستاردىڭ ترانسفورماسياسى، سيفرلاندىرۋ مەن جاساندى ينتەللەكتىنىڭ دامۋى اتا زاڭدى كەشەندى تۇردە قايتا قاراۋدى تالاپ ەتەدى. كوميسسياعا ەكى مىڭنان استام ۇسىنىس كەلىپ ءتۇستى، ولار قازىرگى كونستيتۋسيالىق نورمالاردىڭ جارتىسىنان استامىن قامتيدى، بۇل تەك جەكەلەگەن باپتاردى جاڭارتۋ ەمەس، مەملەكەتتىڭ باسقارۋ قۇرىلىمىنىڭ ارحيتەكتۋراسىن قايتا قاراۋ قاجەتتىلىگىن كورسەتەدى.
«ءقازىر الدىمىزدا اتا زاڭنىڭ جەكەلەگەن بولىمدەرىن تۇزەتۋ نەمەسە تولىقتىرۋدان اسىپ تۇسەتىن مىندەت تۇر. بۇل — مەملەكەتتىك باسقارۋ جۇيەسىنىڭ، قۇقىقتار مەن بوستاندىقتاردىڭ كەپىلدىكتەرىنىڭ جانە بيلىك پەن قوعام اراسىنداعى ءوزارا ىقپالداستىق تەتىكتەرىن تەرەڭ قايتا قاراۋ»، — دەدى دانيا ەسپايەۆا.
ول سونداي-اق بۇل ءتاسىل قۇقىقتىق اكتىلەر تۋرالى زاڭناما تالاپتارىنا ساي ەكەنىن اتاپ ءوتتى: نورماتيۆتىك قۇجات ءماتىنىنىڭ جارتىسىنان استامى وزگەرگەن جاعدايدا ونىڭ جاڭا رەداكسياسى قابىلدانۋى ءتيىس. وسى لوگيكا بويىنشا، جاڭا كونستيتۋسيانى ازىرلەۋ زاڭعا نەگىزدەلگەن قادام بولىپ تابىلادى.
«جاڭا كونستيتۋسيا مەملەكەتتىڭ تۇراقتى دامۋى ءۇشىن بەرىك قۇقىقتىق نەگىز بولۋعا ءتيىس. بۇل قازاقستاننىڭ مەملەكەتتىلىكتىڭ جاڭا كەزەڭىنە قادام باسىپ وتىرعانىنىڭ اشىق جاريالانعان جاۋابى بولادى»، — دەپ تۇيىندەدى دانيا ەسپايەۆا.