«ءادىل ءسوز» حالىقارالىق قورىنىڭ پرەزيدەنتى قارلىعاش جامانقۇلوۆا قازاقستاننىڭ جاڭا كونستيتۋسياسىندا ءسوز بوستاندىعى مەن شىعارماشىلىق ەركىندىكتى قورعاۋ نورمالارىنىڭ بەكىتىلۋىن جوعارى باعالادى. ءوز پىكىرىن ول كونستيتۋسيالىق رەفورما جونىندەگى كوميسسيانىڭ بەسىنشى وتىرىسىندا ءبىلدىردى.
قارلىعاش جامانقۇلوۆانىڭ ايتۋىنشا، ءسوز بوستاندىعى ازاماتتارعا ومىرلىك ماڭىزى بار شەشىمدەر قابىلداۋ ءۇشىن قاجەتتى وبەكتيۆتى، تولىق جانە شىنايى اقپاراتتى ۋاقتىلى الۋعا مۇمكىندىك بەرەدى جانە سونىمەن قاتار مەملەكەتتى جۇيەلى قاتەلىكتەردەن قورعايتىن قۇرال رەتىندە قاراستىرىلۋى مۇمكىن.
«ءسوز بوستاندىعى كونستيتۋسيا پرەامبۋلاسىنىڭ جاڭا رەداكسياسىندا جاريالانعان قۇقىقتىڭ ۇستەمدىگى مەن «زاڭ مەن ءتارتىپ» قاعيداتىن ساقتاۋدىڭ راسىمدىك شارتىنا اينالادى»، – دەدى ول.
«ءادىل ءسوز» قورىنىڭ پرەزيدەنتى ءسوز بوستاندىعىن قورعاۋمەن قاتار كونستيتۋسيانىڭ جاڭا رەداكسياسى شىعارماشىلىق ەركىندىكتى دە قورعايتىنىن جانە بۇل ۇعىمداردى عىلىمي، تەحنيكالىق جانە كوركەم شىعارماشىلىقتىڭ بارلىق تۇرلەرىن قامتي وتىرىپ كەڭەيتەتىنىن اتاپ ءوتتى.
«بۇل كەپىلدىكتەر زياتكەرلىك مەنشىكتى قورعاۋمەن قاتار ءجۇرۋى ءتيىس. بۇل اسىرەسە سيفرلىق داۋىردە اسا ماڭىزدى»، – دەدى قارلىعاش جامانقۇلوۆا.
ونىڭ ايتۋىنشا، ازاماتتارعا اقپارات الۋ جانە تاراتۋ قۇقىعى بەرىلەدى، الايدا بۇل قۇقىق باسقا ادامداردىڭ قۇقىقتارى مەن قادىر-قاسيەتىنە، قوعامدىق مورال مەن قوعامدىق تارتىپكە نۇقسان كەلتىرىلمەۋى ءتيىس.
«مۇنداي شەكتەۋلەر كونستيتۋسيا مەن حالىقارالىق قۇقىقتا تانىلعان ماقساتتار ءۇشىن عانا جول بەرىلەدى، ياعني بۇلىڭعىر ءارى ەكىۇشتى تۇسىندىرمەسىز. سەنزۋراعا تىيىم سالىناتىنىن ەرەكشە اتاپ وتكىم كەلەدى»، – دەدى ول.
سونداي-اق، قارلىعاش جامانقۇلوۆا كونستيتۋسيادا قوعامنىڭ رۋحاني-ادامگەرشىلىك قۇندىلىقتارىنا قاتىستى ۇعىمداردىڭ بەكىتىلۋى تۋرالى پىكىر ءبىلدىردى. ونىڭ ايتۋىنشا، اڭگىمە تەك زاڭداردا تىكەلەي بەكىتىلگەن نىساندار جايىندا بولۋى ءتيىس. بۇل قۇقىقتىق بەلگىسىزدىكتىڭ الدىن الۋعا مۇمكىندىك بەرەدى.
«ءسوز بوستاندىعىن، وي مەن شىعارماشىلىق ەركىندىكتى كونستيتۋسيا دەڭگەيىندە كەپىلدەندىرىلگەن تۇردە قامتاماسىز ەتۋ قازاقستاندىق قوعامنىڭ وركەندەۋىنىڭ بەرىك نەگىزى»، – دەدى ول.