جاڭا جىل ءتۇنى قارساڭىندا «استانا» الاڭىندا پوليسيانىڭ بىرىكتىرىلگەن كۇشتەرىنىڭ ساپتۇزەۋى ءوتتى. ونى الماتى قالالىق پوليسيا دەپارتامەنتىنىڭ باستىعى، پوليسيا گەنەرال-مايورى ارىستانعاني زاپپاروۆ جۇرگىزدى، دەپ حابارلايدى Almaty-akshamy.kz الماتى قالالىق پوليسيا دەپارتامەنتى باسپا ءسوز قىزمەتىنە سىلتەمە جاساپ.
«وزدەرىڭىز بىلەتىندەي پوليسيانىڭ باستى مىندەتى – قوعامداعى تۇراقتىلىقتى، زاڭدىلىق پەن ازاماتتاردىڭ قاۋىپسىزدىگىن قامتاماسىز ەتۋ، سونىمەن قاتار حالىقپەن ساپالى جاڭا قارىم – قاتىناس ورناتۋ جانە حالىقتىڭ سەنىمىنە يە بولۋ بولىپ تابىلادى. ءبىزدىڭ قىزمەتكەرلەر – قوعامنىڭ تۇراقتىلىعىمەن جەرىمىزدىڭ قورعانى، تىنىشتىقتىڭ ساقشىسى، مەملەكەت قاۋىپسىزدىگىنىڭ كەپىلى. ءار قىزمەتكەر قىلمىسپەن كۇرەس جانە ازاماتتاردىڭ قۇقىقتارى مەن زاڭدى مۇددەلەرىن قورعاۋ ىسىنە ۇلەسىن قوسۋدا. ءبىز وتان الدىندا قىزمەتتىك بورىشىن ادال ورىندايتىن دەپارتامەنت قىزمەتكەرلەرىن ماقتان تۇتامىز»، - دەدى، ارىستانعاني زاپپاروۆ.
بۇرىن حابارلانعانداي، قالا پوليسەيلەرى قىزمەتتىڭ كۇشەيتىلگەن نۇسقاسىنا اۋىستىرىلدى. پاترۋلدىك جاساقتاردىڭ سانى ۇلعايتىلدى، قىزمەت كورسەتۋ مارشرۋتتارى كۇشەيتىلدى، جاياۋ پاترۋلدىك قىزمەتكە ۇلتتىق ۇلاننىڭ 300 اسكەرى تارتىلدى. ازاماتتار كوپ جينالاتىن ورىندار مەن مادەني-ويىن-ساۋىق شارالارى وتەتىن ورىندار ەرەكشە باقىلاۋدا.
«قۇرمەتتى ارىپتەستەر! الماتى قالاسى پوليسيا دەپارتامەنتى باسشىلىعى جانە ءوز اتىمنان بارشاڭىزدى جاڭا جىل مەرەكەسىمەن قۇتتىقتايمىن! 2024 جىل ىرىس پەن ىنتىماقتىڭ، بەرەكە مەن بايلىقتىڭ، بەيبىتشىلىك پەن باقىتتىڭ جىلى بولسىن. سىزدەرگە جانە وتباسىلارىڭىزعا زور دەنساۋلىق، بەيبىت ءومىر جانە قوعامدىق ءتارتىپتى قامتاماسىز ەتۋ، ەل تىنىشتىعىن قورعاۋ جولىنداعى قاجىرلى ەڭبەكتەرىڭىزگە ساتتىلىك تىلەيمىن!»، – دەدى، الماتى پوليسياسىنىڭ باسشىسى.