مەرەكە كۇندەرى مەگاپوليستە 4 مىڭعا جۋىق ءتارتىپ ساقشىسى قىزمەت ەتپەك.
جاڭا جىل قارساڭىندا الماتى قالاسىنىڭ ءتارتىپ ساقشىلارى كۇشەيتىلگەن رەجيمدە جۇمىس ىستەۋگە كوشتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل - شاھار تۇرعىندارى مەن قوناقتارىنىڭ قاۋىپسىزدىگى ءۇشىن جاسالعان شارۋا. مەرەكە كۇندەرى مەگاپوليستە 4 مىڭعا جۋىق ءتارتىپ ساقشىسى قىزمەت ەتپەك. ولار 5 قاڭتارعا دەيىن مەرەكەلىك ءىس-شارالار بولاتىن كوشەلەردى، جالپى، قالاداعى تىنىشتىقتى باقىلاماق.
مەيرامبەك تىلەۋبەرگەنوۆتىڭ پوليسيا سالاسىندا قىزمەت ەتىپ كەلە جاتقانىنا بيىل 17 جىل. ءوز كاسىبىن شىن سۇيەتىن ءتارتىپ ساقشىسىنىڭ جاڭا جىلدى وتباسىمەن بىرگە قارسى العان كەزى ەسىندە جوق. ويتكەنى بۇل كۇندەرى المالى اۋداندىق پوليسيا باسقارماسىنىڭ جەكە قۇرامى دا كۇشەيتىلگەن رەجيمگە اۋىسادى، جۇمىس ەكى ەسەگە كوبەيەدى. ءتارتىپ ساقشىلارى قولدان كەلگەنشە زاڭ بۇزىلماۋىن قاداعالايدى. پوليسيا دەپارتامەنتى ءقازىر ءۇش اۋىسىمدا كۇنى-تۇنى ۇزدىكسىز جۇمىس ىستەيدى. بۇل حالىق ءۇشىن جاسالىپ وتىر.
«بارلىق حالىق دەمالادى. باسقا وبلىستاردان جاڭا جىلعا، قوناققا كەلەتىندەر بار. بىزدە قالادا رەجيم كۇشەيەدى. نەگە؟ ويتكەنى، قىلمىستىڭ، اكىمشىلىك جاۋاپكەرشىلىكتىڭ الدىن الۋ ءۇشىن. جاڭاعى قىدىرىپ كەلىپ جاتقان، دەمالىپ جۇرگەن ازاماتتاردىڭ تىنىشتىعى ءۇشىن، سونداي-اق جاڭا جىل قارساڭىندا مەرەكە شىرقىن بۇزباۋ ءۇشىن ءتارتىپ قاتاڭ ساقتالۋى كەرەك»، – دەدى المالى اۋداندىق پب اعا ينسپەكتورى مەيرامبەك تىلەۋبەرگەنوۆ.
مەيرام كۇندەرى جولداعى قاۋىپسىزدىككە اسا ءمان بەرىلمەك. ويتكەنى اششى سۋدى ۇرتتاپ الىپ كولىك تىزگىندەيتىندەر جانە اسا جوعارى جىلدامدىقپەن كەشكى جارىس وتكىزەتىندەردىڭ قاتارى ارتاتىن كورىنەدى. ولارعا ءتارتىپ ساقشىلارى رەيد جۇرگىزىپ، ورەسكەل قاتەلىكتەردى بولدىرماۋعا اتسالىسادى.
«جاڭا جىلدا كوبىنە وتباسىلىق-تۇرمىستىق قىلمىس ءجيى تىركەلەدى. ياعني توبەلەس، جانجال، ۇساق بۇزاقىلىقتار. سوڭعى جىلدارى اۋىر جانە اسا اۋىر قىلمىستار تىركەلگەنى ەستە جوق. اسىرەسە، مەرەكە كەزىندە مۇلىك جانە قالتا ۇرلىعى، ادامداردى الداۋ جاعدايى كوپ كەزدەسەدى. وڭاي جولمەن ولجا تاپقىسى كەلەتىندەر مەرەكەگە دايىندىقتى پايدالانىپ تەلەفون، اقشانى ۇپتەپ كەتەدى»، – دەدى پوليسيا دەپارتامەنتىنىڭ رەسمي وكىلى سالتانات ازىربەك.
جاڭا جىل مەرەكەسى حالىق ءۇشىن دەمالىس بولسا، ال پوليسەيلەر ءۇشىن قىزۋ جۇمىس. ءتارتىپ ساقشىلارىنىڭ باسىم بولىگى بۇل ءتۇندى قىزمەت بابىندا قارسى الادى. ولار حالىقتى زاڭ تالاپتارىن قاتاڭ ساقتاۋعا شاقىرادى.