الماتىنىڭ بالۋان شولاق اتىنداعى سپورت جانە مادەنيەت سارايىندا شاحماتتىڭ راپيد جانە بليس تۇرىنەن الەم چەمپيوناتىنىڭ جابىلۋ سالتاناتى ءوتتى.
سالتاناتتى راسىمدە الماتى اكىمى ەربولات دوسايەۆ جارىس جەڭىمپازدارىن قۇتتىقتاپ، حالىقارالىق شاحمات فەدەراسياسىنا العىس ايتتى.
«الەمدىك دودانى ۇيىمداستىرعانى ءۇشىن فيدە حالىقارالىق شاحمات فەدەراسياسىنا، قازاقستان شاحمات فەدەراسياسىنا، سونداي-اق بارلىق سەرىكتەستەرگە ۇلكەن العىسىمدى بىلدىرەمىن. بارلىق قاتىسۋشىلاردى، اسىرەسە، بەدەلدى حالىقارالىق ءتۋرنيردىڭ جەڭىمپازدارىن قۇتتىقتايمىن! ءبىزدىڭ ادەمى قالامىزدا الەم چەمپيوناتىنىڭ ءوتۋى جانە الەمنىڭ كىل مىقتىلارىن جينايتىن ورتالىققا اينالۋى ءبىز ءۇشىن ۇلكەن مارتەبە بولدى. الماتى شاحمات تۋرنيرلەرىن وتكىزۋ ءۇشىن تۇراقتى ورىنعا اينالادى دەپ سەنەمىن. مەن چەمپيوناتتى مۇقيات قاداعالاپ، جانكۇيەرلەردىڭ قاتارىندا بولدىم. جاڭا جىل قارساڭىندا بارشاڭىزعا زور دەنساۋلىق، بەيبىتشىلىك، اماندىق جانە جاڭا بيىكتەر تىلەيمىن. ءبىزدىڭ قوناقجاي جانە ادەمى قالامىز ءسىزدىڭ جۇرەگىڭىزدە قالاتىنىنا سەنىمدىمىن»، – دەدى قالا باسشىسى.
ايتا كەتكەن ءجون، جاھاندىق دوداعا 50 ەلدىڭ ۇزدىك 290 شاحماتشىسى قاتىستى. 26-28 جەلتوقسان ارالىعىندا راپيد ويىندارى، 29-30 جەلتوقسان كۇندەرى بليس ويىندارى ءوتتى. سونداي-اق، جارىس كۇندەرى تورەشىلەر كورپۋسىنا ارنالعان فيدە سەمينارلارى، بالالار مەن بارلىق اۋەسقويعا ارنالعان ءبىر مەزگىلدە ويىن سەانستارى مەن بليستەر، IT سالاداعى باعدارلاماشىلار ءۇشىن جەكە تۋرنير ۇيىمداستىرىلدى.
راپيدتەن ەرلەر اراسىندا جارىس ءفاۆوريتى نورۆەگيالىق ماگنۋس كارلسەن جەڭىسكە جەتىپ، ءتورتىنشى رەت چەمپيون بولدى. ول بۇعان دەيىن 2014، 2015، 2019 جىلدارى جىلدام شاحماتتان الەم چەمپيونى اتانعان.
«مەنى توقتاتاتىن ادام شىققان كەزدە عانا مەن مانسابىمدى اياقتايمىن. جالپى، تۋرنير دەڭگەيى وتە جوعارى. جەڭىسكە جەتۋ وڭاي بولعان جوق»، – دەپ ءوز جەڭىسىنەن كەيىن ماگنۋس كارلسەن پىكىر ءبىلدىردى.
ايتىلعان جارىس تۇرىنەن 2-ورىن 18 جاستاعى نەمىس گروسسمەيستەرى ۆينسەنت كەيمەرگە بۇيىردى. ال 3-ورىنعا امەريكالىق شاحماتشى فابيانو كارۋانا جايعاستى.
ال ايەلدەر اراسىنداعى جىلدام شاحماتتا وتانداسىمىز دينارا ءسادۋاقاسوۆا شەبەر ونەر كورسەتىپ، الەم چەمپيوناتىنىڭ كۇمىس جۇلدەسىنە يە بولدى. باس جۇلدە قىتايلىق تان چجۋنيگە، ال قولا مەدال ءۇندىستان شاحماتشىسى شري ساۆيتەگە بۇيىردى.
بليس جارىسى دا قازاقستان قۇراماسى ءۇشىن جەڭىستى بولدى. ءبيبىسارا اساۋبايەۆا بليستەن ءوزىنىڭ چەمپيوندىق اتاعىن قورعاپ، التىننان القا تاقتى. ەكىنشى جانە ءۇشىنشى ورىندارعا ءۇندىستاندىق حامپي كونەرۋ جانە پولينا شۋۆالوۆا (فيدە) جايعاستى.
“مەن ۇلكەن جاۋاپكەرشىلىكتى سەزىندىم. جەڭىسكە جەتكەنىمە قۋانىشتىمىن. ءدال وسىنداي جەتىستىككە قازاقستاندا جەتكەنىم قۋانىشتى ءتىپتى ەسەلەيدى”، - دەدى ب.اساۋبايەۆا.
ەرلەر اراسىنداعى بليستە تاعى دا ماگنۋس كارلسەنگە تەڭ كەلگەندەر بولعان جوق. ول الماتى وتكەن الەم چەمپيوناتىندا قوس التىن قانجىعىلادى. اتالمىش جارىس تۇرىنەن جەڭىس تۇعىرىنىڭ ەكىنشى ساتىسىنا امەريكالىق حيكارۋ ناكامۋرا شىقتى. ۇزدىك ۇشتىكتى ارمەنيالىق حايك مارتيروسيان تۇيىندەدى.
ءتۋرنيردىڭ ۇيىمداستىرۋشىلارى - فيدە جانە قازاقستان شاحمات فەدەراسياسى. چەمپيونات الماتى قالاسى اكىمدىگىنىڭ جانە قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن وتكىزىلدى.