بۇگىنگى تاڭدا ەلىمىزدە تۇرمىستىق زورلىق-زومبىلىق ماسەلەسى، بۇرىنعى كەڭەس وداعىنىڭ كوپتەگەن ەلدەرىندەگىدەي، وتە وزەكتى جانە وتكىر تاقىرىپ. ءبىرقاتار ادامدار پسيحولوگيالىق تۇرعىدان دا ءۇي تيرانىنىڭ قۇرباندارى اتانۋدا.
وسى جاعدايدىڭ الدىن الۋ ماقساتىندا نۇرجان جاسۇزاقوۆتىڭ جەتەكشىلىگىمەن «گۇلبولسىن» جوباسى ازىرلەنىپ، كومەككە مۇقتاج جاندارعا قولداۋ كورسەتىلۋدە. اتالمىش ءىس-شارا قالامىزداعى اق جاۋلىقتى ابزال جانداردىڭ قۇقىقتارىن قورعاۋعا باعىتتالعان. «داعدارىس ورتالىقتارىمەن بىرىككەن جوبامىزعا 10-نان استام ادام تارتىلعان. بۇل جەردە ءوز سالاسىنىڭ ماماندارى، پسيحولوگتار، زاڭگەرلەر، رەپرودۋكتولوگتار مەن جاتتىقتىرۋشىلاردى كەزدەستىرۋگە بولادى. توپ جۇمىسى ەرتە جاستان جىنىستىق قاتىناستىڭ الدىن الۋ، جۇكتىلىك جانە سۋيسيدپەن كۇرەسۋگە باعىتتالعان»، – دەيدى ۇيىمداستىرۋشى اقنۇر وسپانوۆا.
جوبا 2021 جىلدىڭ جەلتوقسانىنا دەيىن جالعاسادى. ەرىكتىلەر بۇل جوبانىڭ تاقىرىبىنا وراي بولاشاققا ۇلكەن جوسپارلار قۇرۋدا. ولار «جوبا تەك الماتى قالاسىن عانا ەمەس، بۇكىل قازاقستاندى قامتۋى قاجەت» دەيدى. سونىمەن قاتار، «ۆولونتەرلار ليگاسى» ۇيىمى ءار سالادا جەتىستىككە جەتكەن اياۋلى جانداردى ءبىر سالاعا توپتاستىراتىن «اياۋلى جان» جوباسىن قولعا العان. بۇل – عىلىمدا، كينودا، جۋرناليستيكادا، مەنەدجمەنت سالاسىندا جەتىستىككە جەتكەن مىقتى ايەلدەر تۋرالى جوبا. ءىس-شارا بارىسىندا ءارتۇرلى ترەنينگتەر، سپيكەر ايەلدەرمەن ماستەر-كلاستار ءوتۋ جوسپارلانۋدا.
«جالعىزباستى انالارعا كورسەتىلىپ وتىرعان كومەك وتە از. مەنىڭشە، بولاشاقتا اليمەنت ماسەلەسىن شەشۋ بويىنشا ارنايى قور قۇرۋ قاجەت. قوعام كوپ جاعدايدا كىنانى ايەلدىڭ موينىنا ءىلىپ قويادى. بىزدە «اجىراسسا دا، كۇيەۋى قول كوتەرسە دە، مۇگەدەك بالا تۋسا دا، ايەل كىنالى» دەگەن تۇسىنىك قالىپتاسقان. سوندىقتان كوپ جاعدايدا ايەلدەر زورلىققا شىدايدى. قازاقستاندا 400 مىڭنان اسا جالعىزباستى انا بار. بۇل – ءبىزدىڭ قوعامداعى اسا وزەكتى ماسەلەنىڭ ءبىرى. بالاعا كوزى اشىق، ساناسى وياۋ انا كەرەك. اناسى ءبىلىمسىز بولسا، بالاسى دا ءبىلىمسىز بولىپ وسەدى. قالاي بولعاندا دا، بالانى قارايتىن ايەل»، – دەيدى Miss ATU–2017، Dinara Cosmetics برەندىنىڭ نەگىزىن قالاۋشى دينارا جولداسوۆا.