الماتى اكىمدىگى بەكىتكەن ەگجەي-تەگجەيلى جوسپارلاۋدىڭ جاڭا جوبالارى نۇكتەلى قۇرىلىسقا تىيىم سالادى. جاڭا ەتج قالانىڭ 2040 جىلعا دەيىنگى باس جوسپارىنا سايكەس ازىرلەندى، وندا مەگاپوليستى دامىتۋدىڭ مونوسەنتريستىك مودەلىنەن پوليسەنتريستىككە كوشۋ قاعيداسى جاتىر.
قالالىق جوسپارلاۋ جانە ۋربانيستيكا باسقارماسى جاڭا ەتج-دا قازاقستاندىق قالا قۇرىلىسى تاجىريبەسىندە العاش رەت اقىلعا قونىمدى تىعىزدىقتاعى توقساندىق قۇرىلىس جانە بارلىق كوشەنىڭ قىزىل سىزىعى قولدانىلاتىنىن اتاپ ءوتتى. بۇل رەتسىز جانە نۇكتەلى قۇرىلىسقا تىيىم سالىپ، قايتا جاڭارتۋدا دا، جاڭا قۇرىلىس كەزىندە دە كوشە-جول جەلىسىن رەتكە كەلتىرەدى.
بۇل رەتتە، ءاربىر ەتج-دا حالىقتىڭ تىعىزدىعى، سونىمەن قاتار، كوممۋنالدىق، كولىكتىك، ەنەرگەتيكالىق جانە الەۋمەتتىك ينفراقۇرىلىم ەسكەرىلگەن.
ەستەرىڭىزگە سالا كەتەيىك، باس جوسپار بويىنشا الماتىنىڭ قۇرىلىس تىعىزدىعى ءىرى قالالارعا نورماتيۆتەر بويىنشا قويىلعان تالاپتان تومەن. بۇعان قوسا، الماتى قالاسىنىڭ اكىمدىگى تاۋ بوكتەرىندە قۇرىلىس سالۋعا تىيىم سالۋ جانە قۇرىلىستىڭ سەيسميكالىق قاۋىپسىزدىگىن قامتاماسىز ەتۋ بويىنشا جوسپارلى جۇمىس جۇرگىزىپ وتىر.
سونىمەن، تاۋ بەتكەيىنىڭ تىكتىگى 15 گرادۋستان اساتىن جەرلەردە از قاباتتى كوپپاتەرلى عيماراتتار سالۋعا دا تىيىم سالىنادى. بۇل نورما تاۋ بوكتەرىندەگى قۇرىلىستىڭ دامۋىنا جول بەرمەيدى.
اباي داڭعىلىنىڭ وڭتۇستىگىندە، ءال-فارابي داڭعىلىنىڭ سولتۇستىگىندە، ءاشىموۆ كوشەسىنىڭ شىعىسىندا، شااج باتىسىنداعى ۇيلەر 9 قاباتتان اسپاۋى كەرەك.
وسى جانە باسقا قالا قۇرىلىسى شەكتەۋلەرى قۇرىلىس تىعىزدىعىن تومەندەتەدى جانە قاۋىپسىزدىكتى ارتتىرادى.
جالپى، ەتج تۇراقتى جانە فۋنكسيونالدى قالالىق كەڭىستىك قۇرۋعا باعىتتالعان. ولار قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ نىساندارىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى جۇرگىزۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.