ەل پرەزيدەنتى قاسىم-جومارت توقايەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا دامۋدىڭ نەگىزگى باعىتتارىن ايقىنداپ بەردى.
جاڭا جولداۋ ەكونوميكالىق جۇيەنى جاڭعىرتۋدىڭ كەشەندى جانە تۇجىرىمدامالىق تاسىلدەرىمەن ەرەكشەلەنەدى. ناۋرىزداعى جولداۋ بارىسىندا مەملەكەت باسشىسى قىركۇيەكتە قازاقستاندى ودان ءارى دامىتۋدىڭ نەگىزگى ۇسىنىستارى مەن قاعيداتتارىن ۇسىناتىنىن مالىمدەگەن بولاتىن. پرەزيدەنتتىڭ وتانداستارىمىزدىڭ يگىلىگىنە باعىتتالعان ساياسي پراگماتيزمىن، جۇيەلى جۇمىسى مەن ايقىن ماقساتتارىن كورىپ وتىرمىز.
ەكونوميكالىق ماسەلەلەردى شەشۋ جانە سالالار اراسىنداعى ءتيىمدى تەتىكتەردى قۇرۋ ءۇشىن جاڭا ەكونوميكالىق ساياسات پرينسيپتەرى ۇسىنىلدى.
⮚ ءبىرىنشى. كاسىپكەرلىك باستامانى ىنتالاندىرۋ، مەملەكەتتىك كاپيتاليزمنەن جانە ەكونوميكاعا شەكتەن تىس ارالاسۋدان باس تارتۋ. بۇل جەردە اتاپ وتكىم كەلەتىنى، الەمنىڭ دامىعان ەكونوميكالارىنىڭ قالىپتاسۋىن تالداۋ مەملەكەت ەكونوميكا سالالارىن كاسىپكەرلىك ورتاعا، ياعني باسەكەلەستىك ورتاعا بەرەتىنىن كورسەتەدى. جاھاندىق باسەكەگە قابىلەتتىلىك يندەكسى بويىنشا الەم ەلدەرىنىڭ رەيتينگىسىندە «كومپانيالاردىڭ باسەكەگە قابىلەتتىلىگى» دەگەن جەكە كورسەتكىش بار. بۇل مەملەكەتتىڭ ەكونوميكاعا ارالاسۋىن ازايتۋدىڭ قانشالىقتى ماڭىزدى ەكەنىن كورسەتەدى.
⮚ ەكىنشى. باسەكەلەستىكتى دامىتۋ، ياعني بارلىعىنا تەڭ مۇمكىندىكتەر بەرۋ.
وسى ورايدا نازار اۋدارعىم كەلەتىنى، ستارتاپ اشۋعا، جۇمىس ىستەپ تۇرعان بيزنەستى كەڭەيتۋگە نەمەسە كاسىپكەرلىكتە جاڭا باعىتتاردى اشۋعا بىردەي مۇمكىندىكتەر بولعان كەزدە قۋاتتى ەكونوميكا قالىپتاسادى. تۇراقتى ەكونوميكا – شاعىن جانە ورتا بيزنەستىڭ ۇلكەن سەكتورى قالىپتاسقان ەكونوميكا ەكەنىن ءبارىمىز جاقسى بىلەمىز. قازاقستاندا جۇمىس ىستەپ تۇرعان شاعىن، ورتا كاسىپورىنداردىڭ جالپى سانى 1،4 ميلليون سۋبەكتىگە جەتتى، بۇل سالادا جۇمىس ىستەيتىن ادامدار سانى 3،5 ميلليوندى قۇرايدى. وسى رەتتە بۇل كورسەتكىش سانمەن عانا ولشەنبەيتىنىن، ەڭ باستىسى – كاسىپورىنداردىڭ ساپاسى مەن تۇراقتىلىعى ەكەنىن اتاپ وتكىم كەلەدى.
⮚ ءۇشىنشى. ۇلتتىق تابىستى ءادىل ءبولۋ. پرەزيدەنتتىڭ بالالار كاپيتالىن قالىپتاستىرۋ تۋرالى شەشىمىنىڭ ستراتەگيالىق ماڭىزى بار دەپ ەسەپتەيمىن. ويتكەنى، بالالار – ءبىزدىڭ كەمەل كەلەشەگىمىز. ەلىمىزدىڭ بارلىق بالاسى كامەلەتكە تولعانعا دەيىن جوعارى وقۋ ورىندارىنا نەمەسە باسپاناعا باستاپقى كاپيتال الادى. بۇل مەملەكەتتىك قولداۋ شاراسى قازاقستانداعى وتباسىلارعا تىكەلەي كومەك كورسەتەدى.
قورىتىندىلاي كەلگەندە، جولداۋ ەل دامۋىنىڭ ساپالى جاڭا مودەلىن جۇزەگە اسىرۋدى، قازاقستاننىڭ ۇزاق مەرزىمدى ەكونوميكالىق ءوسىمىنىڭ تۇراقتىلىعىن قامتاماسىز ەتەدى.