2023 جىلدىڭ باسىنان باستاپ 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە حالىقتىڭ الەۋمەتتىك وسال توپتارىنا جاتاتىن ازاماتتارعا جاڭا بيزنەس-يدەيالاردى ىسكە اسىرۋ ءۇشىن 9 102 گرانت، ونىڭ ىشىندە اۋىل تۇرعىندارىنا 6 011 گرانت بەرىلدى.
2023 جىلى جالپى 9000 گرانت بەرۋ جوسپارلانعان بولاتىن، دەپ حابارلايدى Almaty-akshamy.kz.
2023 جىلى مال شارۋاشىلىعىنا – 2 907، وسىمدىك شارۋاشىلىعىنا – 148، مۇكاممال، ەڭبەك قۇرالدارىن ساتىپ الۋعا – 2 221، تەحنولوگيالىق جابدىقتاردى ساتىپ الۋعا – 3 661، ورىن جايدى جالعا الۋعا – 165 قايتارىمسىز گرانتتار بەرىلدى.
الۋشىلاردىڭ ساناتتارى بولىنىسىندە كوپبالالى وتباسىلاردىڭ مۇشەلەرىنە – 4 963، مۇگەدەكتىگى بار ادامدارعا – 1 827، مۇگەدەكتىگى بار بالالاردى تاربيەلەپ وتىرعان اتا-انالارعا – 1 118، اتاۋلى الەۋمەتتىك كومەك الۋشىلارعا – 562، اسىراۋشىسىنان ايىرىلۋ بويىنشا تولەم الۋشىلارعا – 421، قونىس اۋدارۋشىلارعا – 181 جانە قانداستارعا – 30 گرانت بەرىلدى.
بيىل گرانتتار الۋعا وتىنىشتەردى قابىلداۋ 3 لەك بويىنشا وتكىزىلدى. ۇمىتكەرلەردەن بارلىعى 66 مىڭنان استام ءوتىنىش، ونىڭ ىشىندە كوپبالالى وتباسىلاردان – 39،9 مىڭ، مۇگەدەكتىگى بار ادامداردان – 11،7 مىڭ، مۇگەدەكتىگى بار بالاعا كۇتىم جاسايتىن ادامداردان – 8 مىڭ، اتاۋلى الەۋمەتتىك كومەك الۋشىلاردان – 3،5 مىڭ ءوتىنىش قابىلداندى. سونداي-اق، اسىراۋشىسىنان ايىرىلعان ادامدار قاتارىنان 2،6 مىڭ ادام، 702 قونىس اۋدارۋشى جانە 217 قانداس ءوتىنىش بەردى.
وتىنىمدەردىڭ ەڭ كوپ سانى تۇركىستان وبلىسىنىڭ (14،9 مىڭ)، شىمكەنت قالاسىنىڭ (7،8 مىڭ)، جامبىل (7،6 مىڭ)، قىزىلوردا (7،5 مىڭ) وبلىستارىنىڭ جانە ەڭ از سانى ۇلىتاۋ (136) جانە قوستاناي (159) وبلىستارىنىڭ ۇمىتكەرلەرىنەن كەلىپ ءتۇستى.
ەستەرىڭىزگە سالا كەتەيىك، گرانتتاردى ەڭبەك موبيلدىلىگى ورتالىقتارى ۇمىتكەرلەردىڭ وتىنىشتەرىن قاراۋ جونىندەگى اۋداندىق/قالالىق كوميسسيانىڭ شەشىمى نەگىزىندە بەرەدى.
ۇمىتكەرلەر وزدەرىنىڭ بيزنەس-جوبالارىن كوميسسيا وتىرىستارىندا تانىستىرادى. كوميسسيا وتىرىسىنىڭ وتكىزىلەتىن ورنى، كۇنى مەن ۋاقىتى تۋرالى حابارلاما Business.enbek.kz پورتالىندا گرانت الۋعا ءوتىنىش بەرۋشىنىڭ جەكە كابينەتىندە كورسەتىلەدى.
بۇل رەتتە، كوميسسيانىڭ ءاربىر مۇشەسى بيزنەس-جوسپاردى باعالايدى جانە باعالاۋ پاراعىن مىناداي كريتەرييلەر بويىنشا تولتىرادى: بيزنەس-يدەيانىڭ باسەكەگە قابىلەتتىلىگى، وتكىزۋ نارىقتارىنىڭ پىسىقتالۋى، بيزنەس-جوبانىڭ قارجىلىق ومىرشەڭدىگى، كاسىپكەرلىك داعدىلاردىڭ دەڭگەيى، جاڭا جۇمىس ورىندارىن قۇرۋ.
وسىلايشا، گرانت بەرۋ تۋرالى شەشىم كوميسسيالىق جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى كريتەرييلەرى نەگىزىندە قابىلدانادى.
كوميسسيانىڭ شەشىمى تۋرالى اقپارات ۇمىتكەردىڭ Business.enbek.kz پورتالىنداعى جەكە كابينەتىنە جىبەرىلەدى. كوميسسيا وڭ شەشىم قابىلداعان جاعدايدا ۇمىتكەر سالىق ورگاندارىندا ءوز قىزمەتىن تىركەيدى، بانكتىك دەرەكتەمەلەردى ۇسىنادى، شارتقا قول قويادى جانە ودان ءارى توقسان سايىن بولىنگەن قاراجاتتىڭ پايدالانىلۋى تۋرالى ەسەپتەردى ۇسىنادى. مۇنىڭ ءبارى ەڭبەك موبيلدىلىگى ورتالىقتارىنا بارماي-اق، ەلەكتروندىق فورماتتا جاسالادى.
كەلەسى جىلى دا حالىقتىڭ الەۋمەتتىك وسال توپتارىنا 9 مىڭ گرانت بەرۋ كوزدەلگەن.