«جاڭا الماتى» كەشەندى دامۋ جوسپارى بارلىق الماتىلىقتاردىڭ تەڭ جاعدايلاردا ساپالى ءومىر سۇرۋلەرىنە باعىتتالعان
الماتى قالاسىنىڭ اكىمى باقىتجان ساعىنتايەۆ ق ر پرەزيدەنتىنىڭ جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا سۋمەن جابدىقتاۋ جانە سۋدان بۇرۋ جۇيەسىنىڭ قۇرىلىسى، كوشە جارىعى جانە قالاعا قوسىلاتىن شاعىن اۋدانداردىڭ جولدارى تۋرالى ايتتى، دەپ حابارلادى Almaty-akshamy.kz.
كەشەندى دامۋ جوسپارى (كدج) 2020-2024 جىلدارعا ارنالعان جانە جىل سايىن شامامەن 200 ملرد تەڭگە كولەمىندە جوبالىق قارجىلاندىرۋدى قاراستىرعان. جوبانى قارجىلاندىرۋدىڭ جالپى سوماسى 943،7 ملرد تەڭگەنى قۇرايدى.
بۇگىندە كدج اياسىندا قالا شەتىندە كولىك، بيزنەس جانە الەۋمەتتىك ينفراقۇرىلىمدى جاقسارتۋ بويىنشا 286 جوبا جۇزەگە اسىرىلۋدا.
بيىلعى جىلدىڭ باسىنان بەرى الماتىدا 40،5 شاقىرىم سۋمەن جابدىقتاۋ جانە 12،5 شاقىرىم كارىز جەلىلەرىن تارتۋ جۇمىستارى جۇرگىزىلدى. 75 مىڭنان استام تۇرعىندار تۇراتىن 17 شاعىن اۋداندا كوممۋنيكاسيالار قۇرىلىسى ءجۇرىپ جاتىر.
ناۋرىزباي اۋدانىندا «قارعالى» سۋ قابىلداۋ جانە ءسۇزۋ ستانسياسىنىڭ قۇرىلىسى ءجۇرىپ جاتىر. اقساي وزەنىندە وسىعان ۇقساس نىساندى جوبالاۋ اياقتالۋعا جاقىن. وسى ستراتەگيالىق نىساندار پايدالانۋعا بەرىلگەندە 130 مىڭنان استام تۇرعىندار تازا اۋىز سۋمەن تۇراقتى قامتاماسىز ەتىلەدى.
جايلى جاعدايلار جاساۋ جانە قوعامدىق قاۋىپسىزدىكتى قامتاماسىز ەتۋ ماقساتىندا قالانى جارىقتاندىرۋ جۇمىستارى كەڭىنەن جۇرگىزىلۋدە. مەگاپوليستىڭ بارلىق كوشەلەرىنە سىرتقى جارىق ورناتۋ مىندەتى قويىلدى. جىل باسىنان بەرى 508 كوشەدەگى جۇمىس اياقتالدى. قالعان 601 كوشەنى جارىقتاندىرۋ جوسپارلانعان. ناتيجەسىندە قالانىڭ بارلىق كوشەلەرى جارىقتاندىرىلادى.
الماتىنىڭ 49 كوشەسىندە ورتاشا جول جوندەۋ جۇمىستارى جۇرگىزىلدى، 41 كوشەدە جۇمىس جالعاسۋدا. بيىلعى جىلى ۇزىندىعى 227،5 كم بولاتىن 225 كوشەنى جوندەۋ جوسپارلانعان. ونىڭ ىشىندە 18 كوشە ماگيسترالدى كوشەلەرگە جاتادى، ولار – رىسقۇلوۆ داڭعىلى، ساتبايەۆ كوشەسى، سولتۇستىك اينالما، ءسۇيىنباي داڭعىلى، قۇرمانعازى كوشەسى جانە ت.ب. بارلىق جۇمىستاردى قىركۇيەك ايىندا اياقتاتاۋ جوسپارلانعان.
قالادا «جاڭا الماتىنىڭ» سەگىز شاعىن اۋدانىندا – قۇرامىس، سامعاۋ، شاڭىراق-5، وجەت، نۇرشاشقان، قايرات، المەرەك، العاباستا جاڭا جولدار سالىنۋدا. جالپى ۇزىندىعى 108 كم بولاتىن 415 كوشە اسفالتتالادى.
اباي داڭعىلىن، نۇرلى جانە ساين كوشەلەرىن تەسۋ، ءۇش جولايرىعىن سالۋ جۇمىستارى جالعاسۋدا.
جىل سوڭىنا دەيىن الماتىدا مەترونىڭ «سارىارقا» جانە «دوستىق» دەپ اتالاتىن ەكى بەكەتىنىڭ قۇرىلىسى اياقتالادى، 8 جاڭا ەلەكتر پويىزدارىن ساتىپ الۋ جوسپارلانۋدا.
مەتروپوليتەننىڭ ءبىرىنشى جەلىسىنىڭ ەكىنشى كەزەڭىنىڭ ەكىنشى ىسكە قوسۋ كەشەنى اباي داڭعىلىنان تومەن التىنسارين داڭعىلىنان باتىسقا قاراي ياسساۋي كوشەسىنە دەيىن ورنالاسقان. كەشەن قۋما توننەلدەردەن جانە ەكى ستانسيادان تۇرادى: پيلون ءتيپتى تەرەڭ توسەلگەن «سارىارقا» جانە تاياز توسەلگەن «دوستىق» بەكەتتەرىنەن تۇرادى. مامانداردىڭ ەسەبى بويىنشا، ەكىنشى كەشەن ىسكە قوسىلعاننان كەيىن كۇن سايىنعى جولاۋشىلار اعىنى شامامەن 85 مىڭ ادامدى قۇرايتىن بولادى. مەتروپوليتەندە جولاۋشىلار تاسىمالىنىڭ كولەمى ارتىپ، اباي داڭعىلىنىڭ جۇكتەمەسى ازايادى.