الماتى اكىمى باقىتجان ساعىنتايەۆ ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا قالا اۋماعىنىڭ ساۋلەتتىك كەلبەتىن قالىپتاستىرۋدىڭ جانە قالا قۇرىلىسىن جوسپارلاۋدىڭ جاڭا تالاپتارى تۋرالى ايتتى.
جاڭا قۇرىلىس ەرەجەلەرىنىڭ باستى يدەياسى — الماتىنىڭ تاريحي كەلبەتىن ساقتاۋ جانە قالپىنا كەلتىرۋ، قالا قۇرىلىسىنا قويىلاتىن بازالىق تالاپتاردى بەلگىلەۋ. مىسالى، حالىقتىڭ تىعىزدىعى تاريحي ورتالىقتا گەكتارىنا 300 ادامنان، ال باسقا اۋماقتاردا 440 ادامنان اسپاۋى كەرەك. تۇرعىن ءۇيدىڭ ورتاشا قورى ءبىر ادامعا 18-25 شارشى مەتردەن كەم بولماۋى ءتيىس.
اۋلا كەڭىستىگىندە قۇرىلىس سالۋعا جول بەرمەۋ ءۇشىن اۋلا اۋماعى ءبىر ادامعا شاققاندا 10 شارشى مەتر بولۋى جونىندە نورما ەنگىزىلدى، ال قالعان تورتتەن ءبىر بولىگى كوگالداندىرىلۋى قاجەت.
الەۋمەتتىك نىسانداردىڭ قادامدىق قولجەتىمدى بولۋى ءۇشىن قۇرىلىس سالۋشى قۇرىلىس كەزەڭىندە 1 مىڭ ادامعا شاققاندا 100 ورىننان كەم ەمەس بالاباقشا، 1 مىڭ ادامعا شاققاندا 180 ورىنان كەم ەمەس مەكتەپتەر، ەمحانالار جانە پوليسيا پۋنكتتەرىن سالاتىن ورىنداردى قاراستىرۋى ءتيىس.
تاريحي ورتالىققا مىناداي مىندەتتى تالاپتار ەنگىزىلگەن: تاريحي عيماراتتاردى قالپىنا كەلتىرۋ جانە ساقتاۋ؛ قاباتتاردىڭ سانىن شەكتەۋ؛ عيماراتتاردىڭ جاقىن ورنالاسۋىن باعدارلاۋ؛ تاريحي عيماراتتاردى سۇرۋگە جانە ولاردىڭ جانىنان بيزنەس نىساندارىن سالۋعا تىيىم سالۋ؛ قاسبەتتەردىڭ جانە ولاردىڭ بىرەگەيلىگىن بۇزۋعا تىيىم سالۋ.