“ەرالاش” كينوجۋرنالىنىڭ رەجيسسەرى جوعالعان ءاميانىن تاۋىپ بەرگەن جامبىلدىق پوليسەيلەرگە العىس ءبىلدىردى، – دەپ حابارلايدى اlmaty-akshamy.kz Polisia.kz-كە سىلتەمە جاساپ.
رەسەي فەدەراسياسىنىڭ ازاماتشاسى مارينا سۇلەيمانوۆا جامبىل وبلىسى پد پاترۋلدىك پوليسيا باتالونىنىڭ قىزمەتكەرلەرىنە ماڭىزدى قۇجاتتارى، اقشاسى جانە پاتەر كىلتتەرى بار ءاميانىن ىزدەستىرۋدەگى جەدەل ارەكەتتەرى ءۇشىن ءوزىنىڭ شىنايى العىسىن ءبىلدىردى.
رەجيسسەر ايەل ءاميانىن تاكسي كولىگىندە قالدىرىپ كەتكەن. كەدەندىك وتكىزۋ بەكەتىنە كەلگەن كەزدە ءاميانىن جوعالتقانىن ءتۇسىنىپ، دەرەۋ پوليسيا قىزمەتكەرىنە جۇگىنگەن. كەشەندى ءىس-شارالار وتكىزۋ جانە بەينەباقىلاۋ كامەرالارىن قاراۋ بارىسىندا پاترۋلدىك پوليسيا ينسپەكتورى ماديار اسۋبايەۆ تاكسي اۆتوكولىگىن انىقتادى. ناتيجەسىندە از ۋاقىت ىشىندە قۇندى زاتتارى بار ءاميانى تابىلىپ، يەسىنە قايتارىلدى.
– جارتى ساعاتتىڭ ىشىندە پوليسيا قىزمەتكەرى جوعالعان زاتىمدى تاۋىپ، ماعان قايتاردى. سول ساتتە مەن شەت ەلدە جۇرگەندىكتەن، قاتتى قوبالجىپ كەتتىم، كىمگە جۇگىنۋ جانە نە ىستەۋ كەرەكتىگىن بىلمەدىم. ءبىراق پاترۋلدىك پوليسيا ينسپەكتورى مەنى تىنىشتاندىرىپ، ءامياندى تابۋعا ۋادە بەردى. جامبىلدىق پوليسەيلەردىڭ كورسەتكەن قولداۋى، كاسىبي ءارى شۇعىل قىزمەتى ءۇشىن زور العىسىمدى بىلدىرەمىن. پوليسيا قىزمەتكەرىنىڭ جوعارى ناتيجەلەرى مەن بەلسەندى ۇستانىمىنا ءتانتى بولدىم، ولار مەنىڭ شاعىمىم بويىنشا بىردەن ارەكەتكە كوشتى، – دەدى مارينا سۇلەيمانوۆا.