پرەزيدەنتتەن حات العان وقۋشى
جامبىل وبلىسى جامبىل اۋدانىنا قاراستى جاسوركەن اۋىلىنداعى «ءمولدىر» بالاباقشا-مەكتەپ گيمنازياسىنىڭ 2-سىنىپ وقۋشىسى جىبەك يسابەك جۋىردا قاسىم-جومارت توقايەۆقا جۇرەكجاردى تىلەگىن جازعان ەدى، دەپ حابارلايدى Almaty-akshamy.kz.
ساباق ۇلگەرىمى جاقسى، وزات وقۋشىلاردىڭ ءبىرى – جىبەكتىڭ جۇرەگى دە مەيىرىمگە تولى. ونىڭ حاتى مەملەكەت باسشىنىڭ قولىنا تيگەن. پرەزيدەنت جىبەككە جازعان جاۋابىندا حاتتى اسا ريزاشىلىقپەن وقىعانىن ايتىپ، وعان نوۋتبۋك تارتۋ ەتكەن.
«ماعان جولداعان ىستىق لەبىزىڭ ءۇشىن راحمەت. سەنىڭ ەرتەڭگى كۇنى ۇلكەن ازامات بولىپ ءوسىپ، ەلىمىزدىڭ پاراساتتى پەرزەنتى اتاناتىنىڭا كامىل سەنەمىن. ءبىزدىڭ بۇگىن قولعا الىپ جاتقان جۇمىسىمىزدىڭ بارلىعى دا جارقىن بولاشاعىمىزدىڭ يەسى – وزدەرىڭە ارنالادى. سوندىقتان ساباعىڭدى ۇزدىك وقىپ، ۇستازدارىڭ مەن اناڭنىڭ بەرگەن تالىم-تاربيەسىن بويىڭا ءسىڭىرىپ، ماقساتقا ۇمتىلۋدان جالىقپا. وتباسىڭنىڭ قاشان دا ماقتانىشى بولىپ، جەتىستىكتەرگە جەتە بەر، اينالايىن! اناڭ مەن باۋىرىڭا مەنەن سالەم»، – دەپ جازدى قاسىم-جومارت كەمەل ۇلى.