جامبىلدىق وقۋشىلار ادام ءومىرىن قۇتقاراتىن ساعات ويلاپ تاپتى

وقۋشىلاردىڭ ونەرتابىسى «ەكىنشى جۇرەك» دەپ اتالادى.

اتالعان ساعات ينسۋلت، ينفاركت جانە تاعى دا باسقا تالما اۋرۋلارى بار ناۋقاستارعا ارنالعان، دەپ حابارلايدى Almaty-akshamy.kz

ق ر وقۋ-اعارتۋ مينيسترلىگىنىڭ حابارلاۋىنشا، ساعات يەسىنىڭ جۇرەك سوعىسى مەن قان قىسىمىن باقىلاۋدا ۇستاپ، ادام ومىرىنە ءقاۋىپ تونگەن جاعدايدا بەلگى بەرەدى. بۇل اقىلدى ساعاتتى دارىندى بالالارعا ارنالعان جامبىل وبلىستىق مامانداندىرىلعان ليسەيدىڭ 9-سىنىپ وقۋشىسى دۋلات يسابەك پەن 8-سىنىپ وقۋشىسى اديا تۇرسىنباي ويلاپ تاپقان.

ساعاتقا دەنە تەمپەراتۋراسىن، قانداعى وتتەگى پايىزىن، جۇرەك قاعىسىن باقىلاپ تۇرۋ فۋنكسيالارى ەنگىزىلگەن. سونداي-اق، بۇل قۇرىلعى ناۋقاس قۇلاپ، قوزعالىسسىز قالعان جاعدايدا تۋىسىنا نەمەسە جەدەل جاردەمگە دابىل جىبەرەدى. ەڭ باستىسى، ناۋقاستىڭ مەكەن-جايىن، جاتقان جەرىن ناقتى كورسەتەدى.

«ناۋقاستارعا ءتۇرلى سەبەپتەرمەن العاشقى كومەك ۋاقىتىنان كەش بەرىلىپ جاتاتىن كەزدەر بولادى. وسىنداي جاعدايلاردىڭ الدىن الۋ ءۇشىن وسى ساعاتتى ويلاپ تاپتىق»، - دەيدى جاس ونەرتاپقىش دۋلات يسابەك.

وقۋشىلاردىڭ ونەرتابىسىن سىناپ كورۋ ءۇشىن كارديولوگ پەن پاسيەنتتەردىڭ ءپورتاتيۆتى اپپاراتپەن ديناميكالىق باقىلاۋى جۇرگىزىلدى. دۋلات پەن اديا الداعى ۋاقىتتا ساعاتتى ادامداردىڭ ۇنەمى تاعىپ جۇرۋىنە ىڭعايلى ەتىپ جاساۋ جولدارىن قاراستىرۋدا.