تۇرعىنداردى كۇنىنە 3 مەزگىل اۋىزسۋمەن قامتاماسىز ەتۋ ءۇشىن ارنايى تەحنيكا ءبولىندى
جامبىل وبلىسىندا سەل شايعان بىرنەشە اۋىلدا توتەنشە جاعداي جاريالاندى. تابيعي اپاتتان كەلگەن شىعىن كولەمى 135 ميلليون تەڭگەدەن اسقان، دەپ حابارلايدى Almaty-akshamy.kz.
23 ماۋسىم كۇنى تولاسسىز جاۋعان جاڭبىردىڭ سوڭى سەلگە ۇلاسىپ، قورداي اۋدانىنداعى ۇلكەن ءسۇلۋتور جانە نوعايباي ەلدىمەكەندەرىن شايىپ كەتكەن بولاتىن. ناتيجەسىندە 17 ءۇيدىڭ اۋلاسىن سۋ باسىپ، 5 ءۇيدىڭ ىشىنە كىرگەن. 12 ءۇيدىڭ قورا-جايلارى مەن قورشاۋلارى ءبۇلىندى، دەپ جازدى qazaqstan.tv.
ارنايى قۇرىلعان كوميسسيانىڭ مالىمەتىنشە، ءۇش اۋىلدان 169 قوي-ەشكى، 4 جىلقى، 2 سيىر جانە 380 تاۋىق جوعالعان. ءسۇلۋتور ەلدىمەكەنىندە اۋىز سۋ جۇيەسى، ەلەكتر جەلىلەرى ىستەن شىققان. تۇرعىنداردى كۇنىنە 3 مەزگىل اۋىزسۋمەن قامتاماسىز ەتۋ ءۇشىن ارنايى تەحنيكا ءبولىندى. سونداي-اق تاۋ سۋى اۋىلىشىلىك بىرنەشە كوپىردى شايىپ كەتكەن.
ءقازىر وندا ارنايى تەحنيكالار مەن اۆاريالىق توپتار جۇمىلدىرىلىپ، قايتا قالپىنا كەلتىرۋ جۇمىستارى جۇرگىزىلۋدە. اۋىل تۇرعىندارىنىڭ بارلىق شىعىنىن مەملەكەت وتەيدى.