جوسپار 2025 جىلعا دەيىن جۇزەگە اسۋى كەرەك
الماتىداعى اۆتوبۋس پاركى سۋ جاڭا 800 قوعامدىق كولىكپەن تولىعادى. جوسپار 2025 جىلعا دەيىن جۇزەگە اسۋى كەرەك. بۇل اقپارات بۇگىن اكىمدىكتىڭ باسپا ءسوز قىزمەتى جاريالاعان قالانىڭ دامۋ جوسپارىندا ايتىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالا تۇرعىندارى ءۇشىن وزەكتى دەپ تانىلعان ماسەلەلەردىڭ قاتارىندا ايالدامالار مەن قوعامدىق كولىك جايى دا بار. ماسەلەن، ازاماتتار تاراپىنان تۇسكەن وتىنىشتەردىڭ 11 پايىزى اۆتوبۋستىڭ جەتىسپەۋشىلىگىنە، مارشرۋتتار مەن ءجۇرۋ كەستەسىنە قاتىستى ەكەن. ەندىگىدە، اتالعان ماسەلەنى شەشۋ ءۇشىن 2025 پەن 2030 جىلدارعا ناقتى جوسپار بەكىتىلىپ وتىر.
الماتىدا 470 مىڭ جەكە كولىك پەن 230 مىڭ اۆتوموبيل سىرتان كەلەدى. كەپتەلىستەر مەن قوعامدىق كولىكتىڭ قىزمەتىنە قاتىستى ارىز-شاعىمدار دا وسى ارادا تۋىندايدى. لىق تولى اۆتوبۋستار مەن ولاردىڭ ساعاتىنا 20 شاقىرىمنان دا تومەن جىلدامدىعى – كوپتىڭ كوكەيىن تەسكەن اۋەلگى ماسەلە ەكەنى انىق.
اتالعان ماسەلەلەردى ءبىرجاقتى ەتۋ ءۇشىن الداعى 3 جىلدا 200 جاڭا تروللەيبۋس ساتىپ الۋ، گازبەن جۇرەتىن اۆتوبۋستار ءۇشىن 2 پارك، 5 گاز قۇيۋ بەكەتىن سالۋ جانە زاماناۋي فورماتتاعى 200 ايالدامانى ىسكە قوسۋ كوزدەلىپ وتىر. سونداي-اق 2030 جىلعا دەيىن باتىس باعىتتا مەترونىڭ جاڭا 3 بەكەتى سالۋ جوسپاردا بار. جاڭادان 800 اۆتوبۋس قوسىلادى.
«نەگىزى 800 از سان ەمەس، بۇگىندە ءبىزدىڭ ەسەبىمىز بويىنشا 1000-نان كەم بولماۋى ءتيىس. قوعامدىق كەڭەستە مەن باسقارعان كوميسسيانىڭ نەگىزگى ءبىر باعىتى - قوعامدىق ترانسپورت ماسەلەلەرى. سوندىقتان، ءبىز قالا اكىمىنىڭ بەرگەن وسى ماعلۇماتتارىن وتە جاقسى قابىلدادىق»، – دەدى قالالىق قوعامدىق كەڭەستىڭ وكىلى بوريس جاپپاروۆ.
2025 جىلعا قاراي قوعامدىق كولىكتەگى كۇندەلىكتى ساپارلار 1،7 ميلليونعا دەيىن ۇلعايادى دەپ كۇتىلىپ وتىر. بۇل كورسەتكىش ءقازىر شامامەن 1،4 ميلليوننىڭ اينالاسىندا. قالاي بولعاندا دا، جىل سايىن شارا قابىلداۋدى تالاپ ەتەتىن سالا 2030 جىلعا دەيىن ءبىر شەشىمىن تابۋى ءتيىس.