جامبىل اتىنداعى قازاق مەملەكەتتىك اكادەميالىق فيلارمونياسى 89-ماۋسىمىن سالتاناتتى تۇردە قورىتىندىلادى.
24 ماۋسىمدا فيلارمونيانىڭ جەتەكشى سوليستەرى كورەرمەندەرگە ارناپ جوعارى دەڭگەيدە كونسەرت ۇسىنىپ، ءبىر ماۋسىم بويعى شىعارماشىلىق ەڭبەكتىڭ قورىتىندىسىن ساحنا تورىندە تۇيىندەدى. 89 ماۋسىم – ونەر ورداسى ءۇشىن تاريحي، مادەني، رۋحاني ماڭىزعا يە كەزەڭ بولدى. ويتكەنى، بيىل ماۋسىمنىڭ ۇلكەن جاڭالىعى – جامبىل اتىنداعى فيلارمونيانىڭ 90 جىلدىق مەرەيتويى. شىعارماشىلىق مەكەمەنىڭ ءبىر عاسىرلىق مەجەگە تاياۋ ساپارى – قازاق ونەرى مەن ەل مادەنيەتىنىڭ وسىپ-وركەندەۋىمەن تىعىز بايلانىستى.
قازاق مۋزىكاسىنىڭ نەگىزىن قالاۋشى تۇلعالاردان باستاپ، بۇگىنگى كۇننىڭ دارىندى جاس ونەرپازدارىنا دەيىن وسى ساحنادا ونەر كورسەتىپ، ۇلتتىق مادەنيەتتىڭ مارتەبەسىن بيىككە كوتەرىپ كەلەدى. مەرەيتويلىق 89-شى ماۋسىم شەڭبەرىندە ق ر مادەنيەت جانە اقپارات مينيسترلىگىنىڭ قولداۋىمەن ءبىرقاتار ماڭىزدى جوبالار جۇزەگە اسىرىلدى. ماۋسىم بويعى ءاربىر كونسەرت، فەستيۆال، قايىرىمدىلىق شاراسى – كورەرمەن مەن ونەر ۇجىمىنىڭ رۋحاني ۇندەستىگىن، ساباقتاستىعىن ايقىندادى.
جىل باسىندا باستاۋ العان «ۇرپاق ساباقتاستىعى» جوباسى اياسىندا فيلارمونيا الماتى قالاسىنداعى ءبىرقاتار ونەر وقۋ ورىندارىمەن بىرلەسىپ بالالارعا ارنالعان كونسەرتتەر ۇيىمداستىردى. وسى باستاما اياسىندا «اقساي» بالالار ورتالىعى، «شاڭىراق» الەۋمەتتىك قىزمەت كورسەتۋ ورتالىعى جانە الماتى وبلىسىنداعى №1 بالالار ۇيىندە قايىرىمدىلىق كونسەرتتەرى وتكىزىلىپ، الەۋمەتتىك ماڭىزى زور مادەني بايلانىستار ورنادى. مامىر ايىندا ب.بايقاداموۆ اتىنداعى مەملەكەتتىك حور كاپەللاسىنىڭ باستاماسىمەن ءداستۇرلى «گۇل الماتى. Flower City» بالالار مەن جاسوسپىرىمدەر حورىنىڭ فەستيۆالى ءوتتى.
فيلارمونيا بيىل العاش رەت بەينەلەۋ ونەرى سالاسىنا دا نازار اۋداردى. تەمىربەك جۇرگەنوۆ اتىنداعى قازاق ۇلتتىق ونەر اكادەمياسى جانە ورال تاڭسىقبايەۆ اتىنداعى كوللەدجبەن بىرلەسىپ ۇيىمداستىرىلعان اشىق اسپان استىنداعى پلەنەر – سۋرەتشى جاستار ءۇشىن شىعارماشىلىق شەبەرلىكتەرىن شىڭدايتىن ۇلكەن مۇمكىندىككە اينالدى. قاتىسۋشىلار فيلارمونيا عيماراتى مەن ونەر ۇجىمدارىن بەينەلەپ، مەكەمەنىڭ شىعارماشىلىق كەلبەتىن كوركەم تىلدە سويلەتتى. جانە جاس سۋرەتشىلەردىڭ قارا شاڭىراققا ارناعان تۋىندىلارى جىل بويىنا كونسەرتكە كەلگەن كورەرمەنگە ۇسىنىلۋدا.
فيلارمونيا ۇجىمى تەك مادەني شارالارمەن شەكتەلمەي، دەنساۋلىق پەن ۇجىمدىق بىرلىكتى دە باستى نازاردا ۇستادى. اقپان ايىندا قىزمەتكەرلەر اراسىندا ۇستەل تەننيسى مەن شاحماتتان تۋرنير وتكىزىلدى.
ماۋسىم ايىندا ت.ابدىراشيەۆ اتىنداعى ق ر مەملەكەتتىك اكادەميالىق سيمفونيالىق وركەسترى «XX–25» اتتى حالىقارالىق فەستيۆال وتكىزدى. بۇل شاراعا شەتەلدە تۇرىپ، الەمدىك ساحنالاردا ونەر كورسەتىپ جۇرگەن تانىمال سكريپكاشىلار مەرۋەرت كارمەنوۆا (بەلگيا) مەن ەرجان كۋليبايەۆ (يسپانيا) ارنايى شاقىرىلىپ، قازاقستاندىق كورەرمەندەرگە ەسەلى قۋانىش سىيلادى. ۇيىمداستىرۋشىلاردىڭ ايتۋىنشا، فيلارمونيادا ەكىنشى رەت وتكىزىلىپ وتىرعان بيىلعى ەستيۆالدىڭ ەرەكشەلىگى – شەتەلدە ءبىلىم الىپ، كاسىبي تاجىريبە جيناعان قازاق ونەرپازدارىنىڭ ەلگە ورالىپ، ۇلتتىق ونەرگە ۇلەس قوسۋىنا مۇمكىندىك جاساۋ.
سونىمەن قاتار، شىعارماشىلىق ۇجىمدار وزگە قالالار مەن شەت ەلدەردەگى تىڭدارماندارىمىزدى قۋانتۋ ماقساتىندا ونەرساپارلارعا بارىپ، قازاق ونەرىنىڭ جاۋھارلارىنان پاش ەتىپ قايتتى. اتاپ ايتساق، ماۋسىمنىڭ سالتاناتتى تۇردە اشىلۋىنان سوڭ، قازان ايىندا ب.بايقاداموۆ اتىنداعى مەملەكەتتىك حور كاپەللاسى جۇڭگو حالىق رەسپۋبليكاسى ۋحان قالاسىنا بارىپ، كونسەرت بەردى. رەسپۋبليكا بويىنشا ق ر مەملەكەتتىك ۇرمەلى اسپاپتار وركەسترى قاراعاندى قالاسىندا ححV حالىقارالىق «مۋزىكالىق سارىارقا» فەستيۆال اياسىندا ونەر كورسەتتى.
جامبىل اتىنداعى قازاق مەملەكەتتىك اكادەميالىق فيلارمونياسىنىڭ 89-ماۋسىمى – مازمۇنى باي، ماعىناسى تەرەڭ، اسەرى مول كەزەڭ بولدى. الدا – ۇلى مەرەيتويدىڭ جالعاسى، 90 جىلدىق بەلەستىڭ بيىككە بەت العان جاڭا كوكجيەكتەرى تۇر.