جالىنمەن كۇرەسكەن جاۋىنگەر

قوعامدىق تاماقتانۋ ورنىنان قويۋ ءتۇتىن بۋداقتاپ جاتقانىن بايقاعان اسكەري قىزمەتشى جارىلىستىڭ الدىن الۋ ءۇشىن، گاز بالوندارى مەن تەز تۇتاناتىن زاتتاردى سىرتقا شىعارىپ، ءورت سوندىرۋشىلەر كەلگەنشە جالىنمەن جالعىز كۇرەستى، دەپ حابارلايدى اlmaty-akshamy.kz ۆەدومستۆونىڭ باسپا ءسوز قىزمەتىنە سىلتەمە جاساپ.

وقيعا 13 تامىزدا الماتى وبلىسىنداعى قاراكەمەر اۋىلىنان بىرنەشە شاقىرىم جەردە بولعان. الايدا، اسكەري قىزمەتشىنىڭ بۇل ەرلىگى جۋىردا عانا كافە يەلەرىنىڭ اتىنان بولىمگە جەتكەن العىس حات ارقىلى بەلگىلى بولدى.

ۇلتتىق ۇلاننىڭ 6654 اسكەري ءبولىمىنىڭ قىزمەتشىسى، پودپولكوۆنيك باقىت تاشكەنبايەۆ وتباسىمەن ەسىك ەلدى مەكەنىنە بارا جاتقاندا جول بويىنداعى كافەدەن شىققان قالىڭ ءتۇتىندى بايقايدى. وفيسەر توقتاي قالىپ، بىردەن كومەككە جۇگىرەدى.

«كافەدە تەك ايەل ادامدار عانا بولدى. ەڭ الدىمەن، تۇتىندەپ جاتقان اس ۇيگە جۇگىردىم. ەكى گاز بالونىن دالاعا شىعاردىم. وسىدان كەيىن ايەلدەر ءورت ەكىنشى قاباتقا وتەدى دەپ ايقايلادى. سالتانات زالى ەكەن. جيھازدى شىعاردىم، عيماراتتىڭ توبەسىنە وتتىڭ وتۋىنە جول بەرمەۋ ءۇشىن پەردەلەردى جۇلىپ الا باستادىم»، - دەيدى باقىت تاشكەنبايەۆ.

ۇلتتىق ۇلاننىڭ اسكەري قىزمەتشىسى قۇتقارۋشىلار جەتكەنگە دەيىن ءورتتى العاشقى ءسوندىرۋ قۇرالدارىمەن ءوز بەتىنشە ءوشىرىپ، ەۆاكۋاسيالىق وتكەلدەردى بوگدە زاتتاردان بوساتادى. ءورت ءسوندىرۋ كومانداسى جەتكەننەن كەيىن دە باتىلدىعى مەن كاسىبيلىگىن كورسەتىپ، كومەگىن جالعاستىرادى.