جالقامىستىقتار سۋ جالداپ، باتپاق كەشۋدەن ارىلار ەمەس

قىستىڭ كوبەسى سوگىلىپ، قازاقستاندىقتاردلىڭ جىل سايىنعى ماۋسىمدىق ۋايىمى باستالدى. توتەنشە جاعداي مينيسترلىگىنىڭ الدىن الا تاراتقان بولجامى بويىنشا سۋ باسۋ ايماعىندا قالۋ ءقاۋپى ءتونىپ تۇرعان ەلدى مەكەندەر سانى دا كوڭىل قۇلازىتادى. جازىق جەردە ورنالاسقان، تاسقىنداپ سۋ كەلەر ارقىراعان وزەنى جوق بولسا دا، «كۇن جاۋماي سۋ بولىپ وتىرعان» كوپتەگەن اۋىلداردىڭ ءبىرى – جالقامىس اۋىلى. الماتى وبلىسىنىڭ تالعار اۋدانىنا قارايدى. جەرى جازاڭ بولسا دا، حالقىنىڭ كوكتەم شىقسا، جاعدايى مازاڭ. نەگە؟ 

ويتكەنى، اۋىل كوشەلەرى جاسالماعان، ەڭ بولماسا، تاس توسەلمەگەن. كۇز بەن كوكتەم ماۋسىمدارى باستالدى دەگەنشە، جاقسىلاپ، نوسەرلەتىپ جاڭبىر توكتى دەگەنشە، كىشىگىرىم ۆەنەسياعا اينالىپ شىعا كەلەدى. اۋىلدىق وكرۋگ اكىمى حالىقپەن وتكىزەتىن ەسەپتىك كەزدەسۋىندە دە، اۋىل تۇرعىندارىنىڭ تالابى بويىنشا وتەتىن ءماجبۇرلى جينالىستا دا «مەنىڭ قولىمدا نە تۇر؟ وبلىسقا، بەرىسى اۋدانعا ارىز جازىڭدار، سۇراڭدار، تالاپ ەتىڭدەردەن» ارىگە اسپايدى. «قول جيناپ، ارىز جازساڭدار، اۆتوبۋس تا بولدىرتەم، جولعا قاراجات تا بولدىرتەم، تاعىسىن تاعى» دەگەن ۋادەلەرىنەن حالىق شارشاپ ءبىتتى. ويتكەنى، اۋىل اكىمى ۋادە بەرگەنمەن، قۇزىرەتىنە ساي كەلمەيتىن ماسەلەلەر دە شاش-ەتەكتەن.  
قازىرشە توڭنان جەرگە سىڭبەي، جينالا جايىلىپ اۋىل كوشەلەرىن باسقان سۋ اۋىل حالقىنىڭ، بالالاردىڭ تابانىنان ازىرگە سىز بولىپ قانا ءوتىپ تۇر. الايدا، ول سىزدىڭ دا سالدارى سالماقتى. دەنساۋلىق دەپ اتالادى. ال، ەرتەڭ كۇن جىلىنا كەلە كوكتەمگى باتپاق قوسىلعاندا، كۇندە كىر جۋۋمەن كەتەتىن شىعىنداردى تىزبەلەپ كورەلىك. ءارى ول كەزدەگى باتپاق تا جىلى بولمايتىنى بەسەنەدەن بەلگىلى. وعان كۇن سايىنعى سۋ شىعىنى، كىر جۋعىش ۇنتاق پەن سابىندى قوسىڭىز. توزعان جۇيكە تۋرالى جاق اشپاي-اق قويا تۇرالىق. بۇلاردىڭ بارلىعى از دەسەڭىز، مەكتەپكە باتپاقتاپ-شالشىقتاپ، لاي كەشىپ كەلگەن بالالارعا مەكتەپتە ۇستازدار دا، جۇمسارتىپ ايتساق، رەنجيدى: «مىناداي بالشىق كيىممەن نەگە كەلەسىڭ؟» دەپ. اۋىل كوشەلەرىنە ازىرگە الدىمەن ءىرى باللاست، قيىرشىقتى-تاستى قوسپا، تاستى-قۇمدى قوسپا توسەپ، ورنىقتىرىپ الۋ، سودان سوڭ اسفالتتاۋ كەرەك. ابدەن اشىنعان حالىق «تەگى ايناداي عىپ اسفالت توسەمەسە دە، ءجۇرىپ تۇرعانىمىزدا تولارساقتان ساز كەشپەستەي ەتىپ، وسى ايتىلىپ وتىرعان قوسپا-قۇمدارىن جايىپ، تاپتاپ بەرسە ەكەن» دەيدى. «ايعايلاي-ايعايلاي قاسقىردان دا ۇيات بولدى» دەگەندەي، تۇرعىندار «سونىڭ وزىنە رازى بولار ەدىك» دەگەندى ايتىپ وتىر.   
جاقىندا عانا، ياعني اقپاننىڭ 16-سى كۇنى جالقامىس اۋىلىن قۇرامىنا كىرەتىن قاينار اۋىلدىق وكرۋگىنىڭ اكىمى نۇربولات ماناپبايەۆ جالقامىس تۇرعىندارىمەن كەزدەسۋ وتكىزدى. جۇزدەسۋ بارىسىندا اۋىل حالقىنىڭ وزەكتى ساۋالدارى تالقىلاندى. اتاپ ايتقاندا، اۋىل كوشەلەرىن جارىقتاندىرۋ، تاس توسەۋ-اسفالتتاۋ، گازداندىرۋعا قاتىستى، اۆتوبۋس بولگىزۋ، جاعدايى تومەن وتباسىلارعا جاردەم بەرۋ سياقتى ماسەلەلەرگە قاتىستى جايتتارعا جاۋاپ قايتاردى. وسى ايتىلىپ وتىرعان ماسەلەلەر بويىنشا ايتار بولساق، اۋىل حالقى پاندەميا باستالا سالا توقتاعان قالاعا قاتىنايتىن اۆتوبۋس پەن مارشرۋتتى قايتا قالپىنا كەلتىرۋ تۋرالى ارىز جازىپ، قول جيناپ، وبلىستىق اكىمشىلىككە وتكىزدى. وتكەن اپتادا، اقپان ايىنىڭ 10-ى كۇنى. ازىرشە جاۋاپ كۇتىپ وتىرمىز.  گازداندىرۋ جونىنەن گاز اۋىلعا كەلدى، حالىقتىڭ الدى قوسىلىپ، قىزىعىن كورىپ تە باستادى. كوشەلەردى جارىقتاندىرۋ ءۇشىن باعانالار ورناتۋ جۇمىستارى جەردىڭ توڭى جىبىگەنشە كۇتىلەتىنىن ايتتى. ءدال قازىرگى تاڭدا حالىق ءۇشىن كۇيىپ تۇرعان ماسەلە – بىرنەشە كوشەنى ءبىراق جايلاپ، كولشىك-كولشىك بولىپ جاتقان اۋىلدىڭ ىشكى كوشەلەرىنە تاس توگۋ.
ارينە، حالىقتىڭ الدىمەن كورەتىنى جانە ءجيى كەزدەسەتىنى اۋىلدىق وكرۋگ اكىمى بولعاندىقتان، بار رەنىشىن سوعان ارنايتىنى ءسوزسىز. بۇل ماسەلەنىڭ بەرىسى اۋدان، ءارىسى وبلىس اكىمدىگىنىڭ بۇيرىق-پارمەنىمەن شەشىمىن تابارى دا انىق جايت.
وسى ماقالا جازىلىپ جاتقاندا، الماتى وبلىستىق پروكۋراتۋراسىنان:

«اعىمداعى جىلعا جالقامىس اۋىلىنداعى جولداردى جوندەۋدى سۇراعان ارىزدار قابىلداندى. قازىرگى تاڭدا قاراجاتتىڭ ءبولىنۋى كۇتىلىپ وتىر. جوندەۋ جۇمىستارى اقشانىڭ بولىنۋىنە قاراي جۇزەگە اسىرىلاتىن بولادى»، – دەگەن جاۋاپ كەلگەن.