شىعىس قازاقستان وبلىسىنىڭ تارباعاتاي اۋدانىندا ورنالاسقان جالعىزتال اۋىلىنىڭ تۇرعىندارى تولىقتاي سپيرتتىك ىشىمدىكتەردەن باس تارتى. وسىلايشا 150 ادام تۇراتىن جانە 30 ۇيدەن قۇرالعان بۇل اۋىل رەسمي تۇردە «الكوگولسىز اۋىل» مارتەبەسىن الدى. بۇل شەشىم قۇقىق بۇزۋشىلىقتاردىڭ الدىن الۋ، قوعامدىق ءتارتىپتى نىعايتۋ جانە سالاۋاتتى ءومىر سالتىن ناسيحاتتاۋ ماقساتىندا قابىلدانعان شارالاردىڭ ءبىر بولىگى بولىپ تابىلادى، دەپ حابارلايدى aqshamnews.kz
جالپى، بۇل قادام الەۋمەتتىك جاعدايدى جاقسارتۋعا جانە اۋىلداعى تىنىشتىقتى ساقتاۋعا باعىتتالعان.
قۇقىق قورعاۋ ورگاندارىنىڭ دەرەكتەرى بويىنشا، سوڭعى ءۇش جىل ىشىندە جالعىزتال اۋىلىندا بىردە-بىر قىلمىس تىركەلمەگەن. پوليسيا وكىلدەرى اۋىل تۇرعىندارىنىڭ باستاماسىن قولداپ، الكوگولدىڭ كوپ جاعدايدا تۇرمىستىق جانجالدار مەن باسقا دا قىلمىستارعا سەبەپكەر بولىپ جاتاتىنىن اتاپ وتۋدە.
جالعىزتال اۋىلى شىعىس قازاقستان وبلىسىنداعى الكوگولدەن باس تارتقان التىنشى ەلدى مەكەن بولدى. اۋىل تۇرعىندارى بۇل قادامدى تىنىش ءارى دەنى ساۋ ومىرگە جاسالعان ماڭىزدى قادام رەتىندە باعالايدى جانە وزدەرىنىڭ ۇلگىسى باسقا قازاقستاندىقتاردى دا وسى باستامانى قولداۋعا شاقىرادى.