«ەكوعا» قاتىسۋشىلاردىڭ جاس شەكتەۋىنە قاتىستى وزگەرىستەر اتالدى
نۇر-سۇلتان قالاسىنداعى №2 كوپبەيىندى قالالىق اۋرۋحاناسى وتباسىن جوسپارلاۋ ورتالىعىنىڭ گينەكولوگ-ەندوكرينولوگى ايگۇل مۇسابايەۆا «ەكوعا» قاتىسۋشىلاردىڭ جاس شەكتەۋىنە قاتىستى وزگەرىستەردى اتادى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«اڭساعان ءسابي» باعدارلاماسى بويىنشا بالا سۇيۋگە كىمنىڭ مۇمكىندىگى بار؟ بۇل باعدارلاما بويىنشا جاساندى جولمەن ۇرىقتاندىرۋ ءادىسىن بالا سۇيۋگە ءۇمىتتى، رەپرودۋكتيۆتى جاستاعى كەز كەلگەن جۇپ پايدالانا الادى. كونسەرۆاتيۆتى جولمەن ەمدەۋ ناتيجە بەرمەيتىن بەدەۋلىك ديگانوزى قويىلعان پاسيەنتتەرگە ارنالعان.
«ەكوعا» وتباسىلىق جۇپتار دا، جالعىزباستى ايەلدەر دە قاتىسا الادى. قازاقستان ازاماتى بولۋ جانە پاسيەنتتەردىڭ مىندەتتى مەديسينالىق ساقتاندىرۋى بولۋ كەرەك»، - دەگەن مامان مەديسينالىق ساقتاندىرۋ جۇيەسىندە «ەكوعا» قاتىسۋشىلار قانداي كريتەرييمەن ىرىكتەلەتىنىن ايتتى.
«ەڭ ءبىرىنشى رەپرودۋكتيۆتى جاستاعى پاسيەنتتەر، ەرلەر فاكتورىنا بايلانىستى بەدەۋلىك، ايەلدىڭ جاتىر تۇتىكشەلەرىنىڭ ەكەۋى دە بىتەلگەن جاعدايدا نەمەسە وتامەن الىنعان كەزدە حيرۋرگيالىق گيستەروسكوپيا، لاپاروسكوپيا، ەم-شارا ناتيجەسى بولماعان كەزدە «ەكوعا» جۇگىنە الادى. گورمونالدى ەمدەۋ ناتيجەسىز بولعان بەدەۋلىك ءتۇرى دە «ەكوعا» جاتادى. جوعارى تەحنولوگيالاردىڭ ءبارىن پايدالانسا دا، ءبىر جىلدان اسا بالا كوتەرە الماۋدىڭ بەلگىسىز گەنەزى دە «ەكو» جاساتۋعا نەگىز بولادى. جامباس مۇشەلەرىنىڭ ەندومەتريوزىنا بايلانىستى بەدەۋلىك تە «ەكوعا» جاتادى»، - دەدى گينەكولوگ-ەندوكرينولوگى.
ماماننىڭ مالىمەتى بويىنشا، ەكوۇرىقتاندىرۋعا قاتىساتىن ايەلدەردىڭ جاسىنا قاتىستى شەكتەۋ الىنعان.
«دەنساۋلىق ساقتاۋ مينيسترلىگىنىڭ №272 بۇيرىعى بويىنشا كۆوتا بەرۋ مۇمكىندىگى كەڭەيدى. بۇرىن ۇمىتكەرلەردىڭ جاسى 42 جاسقا دەيىن شەكتەۋلى بولعان. جاڭا بۇيرىق بويىنشا ايەل رەپرودۋكتيۆتى جاستا بولۋى كەرەك. وسى اتالعان كورسەتكىشتەر بۇرىنعى بۇيرىقتا بولماعان. سوندىقتان بۇل «ەكوعا» ۇمىتكەرلەردىڭ سانىن ارتتىرادى»، - دەدى ايگۇل مۇسابايەۆا.