جالعان قۇجات 5 000-نان 30 000 تەڭگە ارالىعىندا ساۋدالانعان.
قارجىلىق مونيتورينگ اگەنتتىگىنىڭ قىزمەتكەرلەرى الماتى، شىمكەنت، اقتوبە، پاۆلودار جانە تاراز قالالارىندا جالعان ۆاكسينا پاسپورتىن ساتقانداردى انىقتادى، دەپ حابارلايدى Almaty-akshamy.kz اتالعان اگەنتتىكتىڭ Telegram-كانالىنا سىلتەمە جاساپ.
اتالعان فاكتىلەرگە سايكەس، قىلمىستىق كودەكستىڭ 385-بابىندا كوزدەلگەن قىلمىستىق قۇقىق بۇزۋشىلىق قۇرامىنىڭ بەلگىلەرى، ياعني جالعان قۇجات جاساۋ بويىنشا سوتقا دەيىنگى تەرگەۋ باستالدى.
قازىرگى ۋاقىتتا جالعان ۆاكسينا پاسپورتى بەرىلگەن 37 ازامات، سونداي-اق، جالعان قۇجات جاساۋعا قاتىسى بار 12 ادام، ونىڭ ىشىندە 8 مەديسينا قىزمەتكەرى انىقتالدى.
باسقا كۇدىكتى تۇلعالاردى انىقتاۋ بويىنشا جەدەل-تەرگەۋ شارالارى جالعاسۋدا.
قارجىلىق مونيتورينگ اگەنتتىگى ازاماتتارعا جالعان ۆاكسينا پاسپورتتارىن پايدالانعانى ءۇشىن 160 اەك (467 مىڭ تەڭگە) مولشەرىندە ايىپپۇل سالىناتىنىن نەمەسە سول مولشەردە تۇزەۋ جۇمىستارى نە 160 ساعاتقا دەيىنگى مەرزىمگە قوعامدىق جۇمىستار بولماسا 40 تاۋلىككە دەيىن قاماۋعا الىناتىنىن ەسكە سالادى. پاسپورتتى تىكەلەي قولدان جاساعان ادامدارعا، ونىڭ ىشىندە مەديسينا قىزمەتكەرلەرىنە قاتاڭ جازا قاراستىرىلعان. ولارعا 2000 اەك (5،8 ميلليون تەڭگە) مولشەرىندە ايىپپۇل سالىنادى نەمەسە 600 ساعاتقا دەيىنگى مەرزىمگە قوعامدىق جۇمىستارعا تارتىلادى نەمەسە 2 جىلعا دەيىن باس بوستاندىعىنان ايىرىلماق.