الماتىدا ۇيىمداسقان قىلمىستىق توپتىڭ بەس مۇشەسى قاراجاتتاردى «قولما-قول اقشا تۇرىندە شىعارىپ بەرۋمەن» جانە جالعان شوت-فاكتۋرالاردى جازۋمەن اينالىسقان. وسى فاكتى بويىنشا سوتقا دەيىنگى تەرگەپ-تەكسەرۋدى قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى اياقتادى، دەپ حابارلايدى اlmaty-akshamy.kz باسپا ءسوز قىزمەتىنە سىلتەمە جاساپ.
انىقتالعانداي، ۇيىمداسقان قىلمىستىق توپ مۇشەلەرى مەكەمەلەرگە ەكىنشى دەڭگەيلى بانك شوتتارىنان جۇيەلى تۇردە قاراجاتتاردى زاڭسىز قولما-قول اقشا تۇرىندە شىعارىپ بەرىپ وتىرعان. ياعني ولار ءوز باقىلاۋىنداعى 17 كوممەرسيالىق كومپانيا ارقىلى 5 ملرد تەڭگەدەن استام سوماعا كوممەرسيالىق ۇيىمدارعا قۇرىلىس-مونتاج جۇمىستارى، كولىك قىزمەتتەرى جانە حالىق تۇتىناتىن تاۋارلاردى جونەلتۋ بويىنشا قىزمەت كورسەتۋگە جالعان شوت-فاكتۋرالار جازىپ بەرۋ ارقىلى مەكەمەلەردىڭ سالىق تولەۋدەن جالتارۋىنا كومەكتەسكەن.
قىلمىستىق توپ ۇيىمداستىرۋشىلارى «ءبىر كۇندىك فيرمالاردى» جاقىن تۋىستارى مەن تانىستارىنىڭ اتتارىنا تىركەگەن.
سوت ۇكىمىمەن بەس ايىپتالۋشى كىنالى دەپ تانىلىپ، 2 جىلدان 7 جىلعا دەيىن باس بوستاندىعىنان ايىرىلدى.
«قما «كولەڭكەلى» ەكونوميكانىڭ ۇلەسىن ازايتۋ جانە ادال كاسىپكەرلىك سۋبەكتىلەرىنىڭ قۇقىقتارى مەن مۇددەلەرىن قورعاۋدى قامتاماسىز ەتۋ بويىنشا جۇمىستى تۇراقتى تۇردە جالعاستىراتىن بولادى. ەگەر ءسىز وكىلەتتىكتەردى تەرىس پايدالانۋ، قاراجاتتى جىمقىرۋ نەمەسە باسقا دا ەكونوميكالىق قۇقىق بۇزۋشىلىقتار فاكتىلەرى جايلى بىلسەڭىز، «(https://t.me/afm_insider_bot)افم Insider (https://t.me/afm_insider_bot)» (https://t.me/afm_insider_bot) تەلەگرام بوتىنا حابارلاۋىڭىزدى سۇرايمىز. انونيمدىلىككە كەپىلدىك بەرىلەدى»،-دەلىنگەن حابارلامادا.