سىبايلاس جەمقورلىققا قارسى ءىس-قيمىل اگەنتتىگى جالعان ديپلوممەن جۇمىس ىسەتەگەن جۇزدەگەن باپكەردى انىقتادى.
اگەنتتىكتىڭ رەسمي وكىلى دانيار بيگايداروۆتىڭ ايتۋىنشا، بىلتىر ترەنەرلىك-وقىتۋشىلىق جانە سپورتتىق قىزمەتپەن اينالىسقان 278 ادامنىڭ جالعان ديپلوم پايدالانعانى انىقتالدى، دەپ حابارلايدى aqshamnews.kz
سونىڭ ىشىندە 9 باسشى، 248 جاتتىقتىرۋشى جانە 21 باسقا قىزمەتكەر بار. ونداي ادامداردىڭ باسىم بولىگى بەس وبلىستا اشكەرەلەندى. ولار:
• تۇركىستان وبلىسى – 44 ادام؛
• اتىراۋ وبلىسى – 30 ادام؛
• الماتى وبلىسى – 26 ادام؛
• جامبىل وبلىسى – 22 ادام؛
• اقمولا وبلىسى – 20 ادام؛
"مىسالى، استانا قالاسىندا وليمپيادالىق رەزەرۆتىڭ بالالار-جاسوسپىرىمدەر سپورت مەكتەبىنىڭ باسشىلارىنىڭ ءبىرى جوعارى ءبىلىم تۋرالى جالعان ديپلوممەن جۇمىس ىستەگەن. ونىڭ وقۋ بارىسىندا باسقا سپورت ۇيىمىندا نۇسقاۋشى قىزمەتىن اتقارعانى انىقتالدى"، - دەدى بيگايداروۆ بۇگىنگى بريفينگتە.
ال ماڭعىستاۋ وبلىسىندا وليمپيادالىق رەزەرۆتىڭ وبلىستىق مامانداندىرىلعان بالالار-جاسوسپىرىمدەر سپورت مەكتەبىندە ديرەكتور ورىنباسارى جالعان ديپلوممەن ۇستالدى. قازىرگى كەزدە بارلىق ماتەريال ىشكى ىستەر ورگاندارىنا بەرىلدى. سونىڭ اياسىندا تەرگەۋ شارالارى باستالدى.
"قابىلدانعان شارالار اياسىندا 250 اداممەن ەڭبەك كەلىسىمشارتتارى بۇزىلدى. قالعاندارى بويىنشا جۇمىستان بوساتۋ ماسەلەسى تەرگەۋ ناتيجەلەرى بويىنشا شەشىلەدى"، - دەپ اتاپ كورسەتتى اگەنتتىكتىڭ رەسمي وكىلى.