جالعان اقشا "جارعا جىقتى"

ولارعا 5 جىلدان 5،5 جىلعا دەيىن باس بوستاندىعىنان ايىرۋ جازاسى تاعايىندالدى، دەپ حابارلايدى aqshamnews.kz.

ايىپتالۋشىلار ءىرى كولەمدەگى جالعان 100 دوللارلىق كۋپيۋرالاردى وتكىزبەك بولعان.

اتالعان تۇلعالار باقىلامالى ساتىپ الۋ بارىسىنداعى جالعان كۋپيۋرالاردى وتكىزۋ ارەكەتى كەزىندە ۇستالعان.

«جالعان اقشا جاساۋشىلاردىڭ قۇربانى بولماس ءۇشىن جاقسى باعام بويىنشا ايىرباستاۋدى ۇسىنسا دا، بەيتانىس ادامدارعا اقشا ايىرباستاماڭىز جانە ۆاليۋتانى «دەلدالداردان» ساتىپ الماڭىز. وسىلايشا، قارجىلىق مونيتورينگ اگەنتتىگى الماتىدا ءىرى كولەمدەگى جالعان 100 دوللارلىق كۋپيۋرالاردى وتكىزۋ فاكتىسىن انىقتادى. اتالعان تۇلعالار باقىلامالى ساتىپ الۋ بارىسىنداعى جالعان كۋپيۋرالاردى وتكىزۋ ارەكەتى كەزىندە ۇستالدى»، - دەلىنگەن حابارلامادا.

الماتىنىڭ ەكى تۇرعىنى كريپتوۆاليۋتا ساتىپ الۋ جەلەۋىمەن جالپى سوماسى 32 700 اقش دوللارىن قۇرايتىن جالعان شەتەلدىك كۋپيۋرانى بىرنەشە رەت ساتقان. سوت ۇكىمىمەن ءىستىڭ ەكى قاتىسۋشىسى كىنالى دەپ تانىلىپ، ولارعا 5 جىلدان 5،5 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالعان.

«اگەنتتىكپەن جىل باسىنان بەرى قازاقستان اۋماعىندا اينالىمنان 1 060 جالعان بانكنوت تاركىلەندى، ونىڭ ىشىندە ۇلتتىق ۆاليۋتادا 647 100 تەڭگە سوماسىنا 141 كۋپيۋرا، 90 400 اقش دوللارىنا 905 كۋپيۋرا، 2 000 ەۋروعا 4 كۋپيۋرا، 1 000 يۋان سوماسىنا 10 كۋپيۋرا انىقتالدى. تاركىلەنگەن جالعان بانكنوتتاردىڭ جالپى قۇنى 43 ملن تەڭگەدەن اسادى. جالپى، اعىمداعى جىلى جالعان كۋپيۋرالاردى جاساپ، وتكىزگەنى ءۇشىن 8 ادام 5 جىلدان 6 جىلعا دەيىنگى مەرزىمگە باس بوستاندىعىنان ايىرىلدى»، - دەيدى قما.