الماتى اكىمى ەربولات دوسايەۆ اقش-تىڭ بيزنەس-ميسسيا دەلەگاسياسىمەن كەزدەستى
الماتى اكىمى ەربولات دوسايەۆ اقش ساۋدا پالاتاسىنىڭ تاياۋ شىعىس، تۇركيا جانە ورتالىق ازيا ىستەرى جونىندەگى اعا ۆيسە-پرەزيدەنتى كۋش چوكسي مىرزا باستاعان اقش بيزنەس-ميسسيا دەلەگاسياسىمەن كەزدەستى، دەپ حابارلايدى aqshamnews.kz
Chevron Corporation، Citibank، Global Data Risk، John Deere، Mayer Brown، Wolt، Medtronic، VISA جانە ت.ب. ءىرى حالىقارالىق كومپانيا وكىلدەرىنىڭ قاتىسۋىمەن وتكەن كەزدەسۋدە ساۋدا-ەكونوميكالىق، ينۆەستيسيالىق جانە يننوۆاسيالىق سالالارداعى ەكىجاقتى ىنتىماقتاستىقتىڭ نەگىزگى اسپەكتىلەرى تالقىلاندى.
قالا باسشىسى ازىق-تۇلىك ءوندىرىسى، سيفرلىق تەحنولوگيا، قارجى قىزمەتءى، تۋريزم جانە قىزمەت كورسەتۋ سىندى كوپتەگەن سالانى قامتيتىن اقش-پەن ستراتەگيالىق سەرىكتەستىكتىڭ ماڭىزدىلىعىن اتاپ ءوتتى. 2024 جىلى الماتى مەن اقش اراسىنداعى تاۋار اينالىمى شامامەن 680 ملن. اقش دوللارى بولدى. ءقازىر قالادا امەريكالىق كاپيتالدىڭ قاتىسۋىمەن 343 كاسىپورىن جۇمىس ىستەيدى، بۇل ساۋدا بايلانىسىن ودان ءارى كەڭەيتۋگە سەپتىگىن تيگىزەدى.
كەزدەسۋدە تالقىلانعان ماڭىزدى تاقىرىپتىڭ ءبىرى قالانىڭ ينفراقۇرىلىمى مەن لوگيستيكالىق مۇمكىندىكتەرىن دامىتۋ، سونداي-اق الماتى مەن نيۋ-يورك اراسىنداعى تىكەلەي اۋە رەيستەرىن اشۋ ارقىلى ەلدەر اراسىنداعى ەكونوميكالىق جانە مادەني بايلانىستى نىعايتۋدىڭ ماڭىزدىلىعى ءسوز بولدى.
كەزدەسۋ سوڭىندا ەربولات دوسايەۆ بارلىق قاتىسۋشىعا العىس ءبىلدىرىپ، ەكىجاقتى ىنتىماقتاستىقتىڭ ودان ءارى تابىستى داميتىنىنا سەنىم ءبىلدىردى.