ينتەرنەتتە جالعان اقپارات تاراتقان بلوگەرلەر قانشا تەڭگە ايىپپۇل تولەيدى.
ءماجىلىس دەپۋتاتى ايدوس سارىم «ونلاين-پلاتفورمالار مەن جارنامالار تۋرالى» زاڭدى تانىستىردى، دەپ جازدى Azattyq Ruhy.
ولار - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونلاين-پلاتفورمالار جانە ونلاين-جارناما ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ونلاين-پلاتفورمالار جانە ونلاين-جارناما ماسەلەلەرى بويىنشا تولىقتىرۋلار ەنگىزۋ تۋرالى» زاڭ جوباسى.
حالىقارالىق ىستەر، قورعانىس جانە قاۋىپسىزدىك كوميتەتىنىڭ حاتشىسى ايدوس سارىم زاڭ جوبالارىن تانىستىردى.
ونىڭ ايتۋىنشا، بۇل ءۇش زاڭ جوباسى دەپۋتاتتاردىڭ باستاماسىمەن جاسالدى.
«ءبىز زاڭ شىعارۋشى رەتىندە ومىردەن كىشكەنە كەشىگىپ جاتقان سياقتىمىز. ويتكەنى كوپتەگەن دۇنيەلەر بۇگىنگى كۇنى ينتەرنەت ارقىلى جالعاسىپ جاتىر. قىلمىس تا، باسقا دا نارسەلەر ينتەرنەتتە ءجۇرىپ جاتىر. ال الەمدىك ۇردىستەرگە نازار اۋداراتىن بولساق، بۇل جەردە ۇلكەن پرينسيپ بار. ول - ومىردەگى بار قاعيدات ينتەرنەتتە دە بولۋى كەرەك دەگەن قاعيدات. ياعني وسىنى الىپ قاراساق، بۇل زاڭنىڭ بۇرىنىراق قابىلدانۋىنا نەگىز بار ەدى»، - دەدى سارىم.
دەپۋتات رەسمي ورگاننىڭ ستاتيستيكاسىن مىسالعا كەلتىردى.
«وتكەن جىلدىڭ ىشىندە 5 545 قىلمىس نەمەسە جالعان اقپارات تاراتۋ وقيعاسى بولعان. وسىنىڭ بارلىعىن ەسكەرە وتىرىپ بىرنەش ءۋاجدى العا سالىپ، زاڭ جوبالارىن ازىرلەگەن بولاتىنبىز. بىرىنشىدەن، ول ادام قۇقىقتارىن قورعاۋ. ءبىزدىڭ قازاقستاننىڭ ازاماتتارى ينتەرنەتتە دە قۇقىقتارىنىڭ قورعالعانىن تالاپ ەتەدى. ازاماتتارىمىز قالاي بولعاندا دا ارتىندا كۇشتى مەملەكەت بار ەكەنىن ايقىن سەزىنۋى ءتيىس»، - دەپ ايتتى ول.
دەپۋتات اتاعانداي، قابىلدانىپ جاتقان زاڭدار بىرەۋدىڭ قۇقىعىن بۇزۋ ءۇشىن ەمەس، كەرىسىنشە ازاماتتاردىڭ قۇقىعىن قورعاۋ ءۇشىن جاسالىپ جاتىر.
سونىمەن قاتار، ايدوس سارىم مەملەكەتتىك ءتىل ماسەلەسى دە زاڭدا قارالعانىن ايتتى.
«بۇگىنگى كۇنى بايقاپ وتىرعانىمىزداي، كوپتەگەن الەۋمەتتىك جەلى اقپاراتىن بىردەن قازاق تىلىنە اۋدارۋ مۇمكىندىگىن جاساپ وتىر. بۇل نورمانى بولاشاقتا بۇكىل الەۋمەتتىك جەلى پايدالاناتىنداي جاعدايعا جەتكىزگىمىز كەلەدى. سونىمەن بىرگە مودەراسيانى قازاق تىلىندە دە جۇرگىزۋ ماسەلەسىن قويىپ وتىرمىز. سەبەبى ءقازاقتىلدى اۋديتوريا دا اقپارات الۋعا، تاراتۋعا قۇقىقتارىنىڭ قورعالعانىن تالاپ ەتەدى»، - دەپ ءتۇسىندىردى سارىم.
سونداي-اق، ول جارناما ماسەلەسىنە توقتالدى.
«ءداستۇرلى جارنامانى جاقسى بىلەمىز. تەلەديداردى قوسساق، قايسىسى جارناما، قايسىسى اقپارات ەكەنىن ناقتى بىلەمىز. گازەت پەن جۋرنالدا دا سولاي. ءبىزدىڭ ويىمىزشا، ازاماتتاردىڭ قۇقىعىن قورعاپ، ولاردىڭ الدانباۋ، قارجى پيراميدالارىنا تاپ بولماۋى ءۇشىن الەۋمەتتىك جەلىدەگى جارنامانى دا، دەمەۋشى كونتەنتىن دە ايقىن كورسەتۋىمىز كەرەك. الەمدىك تاجىريبەدە بۇل بار. بلوگەرلەردەن، ينفليۋەنسەرلەردەن وسىنى تالاپ ەتەدى. الەمدىك تاجىريبەدە شەتەلدىڭ ماقالى بار «كەز كەلگەن ادام ءولىم مەن سالىقتان قۇتىلا المايدى» دەگەن»، - دەيدى دەپۋتات.
وسى سەبەپتەن دە دەپۋتات «بلوگەر»، «ينفليۋەنسەر» دەگەن ۇعىم ەنگىزىلىپ وتىرعانىن ايتتى.
«جارنامانىڭ سان الۋان تۇرلەرىن زاڭعا بەكىتىپ، الداعى ۋاقىتتا مۇنىڭ بارلىعى دا ەڭ الدىمەن كاسىپكەرلىك كودەكسكە جانە جىلدىڭ اياعىندا كەلەتىن سالىق كودەكسىنە ەنىپ، كولەڭكەدە، «سۇر ەكونوميكادا» جۇرگەن دۇنيەنىڭ بارلىعىن اشىق الاڭعا شىعارۋ، مەملەكەتتىڭ قازىناسىن تولتىرۋعا پايدالانۋ قاجەت دەپ ەسەپتەيمىز»، - دەپ اتاپ ءوتتى ايدوس سارىم.
دەپۋتات اتاپ وتكەندەي، باستى ماسەلەنىڭ ءبىرى – «جالعان اقپارات» دەگەن ۇعىمدى ەنگىزۋ. ادام قاساقانا ەمەس، قاتەلەسىپ كەتسە نەمەسە باسقا دا جاعداي بولسا، تارالعان اقپارات كوپ زيان تيگىزبەسە، وندا 20 اەك (69 000 تەڭگە) كورسەتكىشكە ايىپپۇل تولەۋ قاراستىرىلعان. ال ەگەر ول قايتالانسا، ول ەكى ەسەلەنەدى.