الماتىدا قالا كورىكتەندىرۋ مەن كوگالداندىرۋ جۇمىستارىنا بولىنەتىن قاراجات 2024 جىلعى 121،6 ملرد تەڭگەدەن 2025 جىلى 170،5 ملرد تەڭگەگە دەيىن 40%-عا كوبەيەدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە الماتى قالاسىنىڭ اكىمى ەربولات دوسايەۆ مالىمدەدى، دەپ حابارلايدى aqshamnews.kz
«كورىكتەندىرۋ مەن كوگالداندىرۋ – جايلى قالالىق ورتا قۇرۋ مەن تۇرعىنداردىڭ ءومىر ساپاسىن ارتتىرۋدىڭ نەگىزگى قۇرامداس بولىكتەرى. وسىعان بايلانىستى مەملەكەت باسشىسى باستاماشىلىق ەتكەن «تازا قازاقستان» اكسياسى ەكولوگيانى جاقسارتۋعا جانە قورشاعان ورتاعا ۇقىپتى قاراۋعا باعىتتالعان»، – دەدى ەربولات دوسايەۆ.
2023 جىلدىڭ قاڭتار ايىنان باستاپ الماتى اكىمدىگى جاڭا جاسىل جەلەكتەردى قورعاۋ جانە كۇتۋ ەرەجەلەرىن ەنگىزۋدى بەلسەندى تۇردە قولعا الدى. ال بيىلعى شىلدە ايىندا جايلى قالالىق ورتانى قامتاماسىز ەتۋ ماقساتىندا الماتى قالاسىن كورىكتەندىرۋدىڭ جاڭا ەرەجەلەرى قابىلداندى.
ايتا كەتەيىك، جاڭا كورىكتەندىرۋ ەرەجەلەرى «تازا قازاقستان» رەسپۋبليكالىق اكسياسىنىڭ يدەياسىنا نەگىزدەلگەن جانە ەلدى مەكەندەردىڭ اۋماعىن كورىكتەندىرۋدىڭ رەسپۋبليكالىق ۇلگىلىك ەرەجەلەرىنە سايكەس ازىرلەنگەن.
جاسىل ەكپەلەردى قورعاۋ جانە كۇتۋ ەرەجەلەرى مەملەكەت باسشىسىنىڭ الماتىدا جاڭا رەكرەاسيالىق ايماقتار قۇرۋ جانە كوگالداندىرۋ جونىندەگى تاپسىرماسىن ورىنداۋ اياسىندا قابىلداندى. بۇل رەتتە، جاڭا كوشەتتەرگە قويىلاتىن تالاپتار كۇشەيتىلىپ، جاسىل ەكپەلەردى كۇتۋ جانە قورعاۋ نورمالارى ارتتىرىلدى، سونداي-اق سۋارۋ جۇيەسىن ورناتۋ مىندەتتى بولىپ بەكىتىلدى. جىل سايىن قالادا 320 مىڭ اعاش پەن بۇتا وتىرعىزۋ جوسپارلانۋدا. 2023-2024 جىلدارى 500 شاقىرىم اۆتوسۋارۋ جانە تامشىلاتىپ سۋارۋ جەلىلەرى ورناتىلدى. ال 2025 جىلى تاعى 290 شاقىرىم جەلى ورناتىلىپ، ميلليوننان استام اعاشتى اۆتوسۋارۋ جۇيەسىمەن قامتۋ جوسپارلانعان.
ەستەرىڭىزگە سالا كەتەيىك، الماتىدا اۋلالاردى كەشەندى كۇتىپ ۇستاۋعا ارنالعان ءۇش جىلدىق كەلىسىمشارتتار ەنگىزىلگەن. ولار سانيتارلىق تازارتۋ، كورىكتەندىرۋ ەلەمەنتتەرىن جوندەۋ جانە جاسىل ايماقتاردى كۇتۋ جۇمىستارىن قامتيدى. سونىمەن قاتار، ماگيسترالدىق كوشەلەر بويىنداعى ۇيلەردىڭ قاسبەتىن جوندەۋگە قاتىستى تاسىلدەر قايتا قارالدى.