جۇڭگو عالىمدارى مەن ۇلىبريتانيانىڭ مەت-وفيس (مەتەوبيۋرو) ماماندارى جاھاندىق جىلىنۋدىڭ جاڭا سالدارىن انىقتادى، دەپ حابارلايدى aqshamnews.kz.
بۇل جايىندا islam.kz پورتالى Science مەرزىمدى باسىلىمىنا سىلتەمە جاساي وتىرىپ ءمالىم ەتەدى. اتالعان دەرەك كوزىندە جاريالانعان زەرتتەۋ ناتيجەسىنە سايكەس ادام تۋدىراتىن (ادامزاتتىڭ اسەرىمەن، سونىڭ ىشىندە، ونەركاسىپ، كولىك، مال شارۋاشىلىعى، قازبالى وتىن ءوندىرىسى، ت.ب.) اتموسفەراعا بولىنەتىن پارنيكتى گازدار جەر شارىنىڭ 75 پايىزىندا جاۋىن-شاشىننىڭ وزگەرمەلىلىگىن، ياعني، قۇبىلمالىعىن ارتتىرعان.
جاۋىن-شاشىننىڭ وزگەرمەلىلىگى جاڭبىردىڭ ۋاقىتى مەن مولشەرى بويىنشا بىركەلكى بولىنبەۋىمەن، دالىرەگى، جاۋماۋىمەن سيپاتتالادى: سالدارى قۇرعاقشىلىققا، جاۋىن-شاشىننىڭ توتەنشە وقيعالارىنا جانە سۋ تاسقىنىنا اكەلەدى. جاۋىن-شاشىننىڭ قۇبىلمالىلىعى كليمات داعدارىسىن ودان ارى تەرەڭدەتەدى. ءبىر تاۋلىكتە جاۋىن-شاشىننىڭ وزگەرۋ جيىلىگى بۇكىل الەمدە سوڭعى ون جىلدا 1،2 پايىزعا وسكەن؛ بۇل تەندەنسيا 1950 جىلدان كەيىن ايقىنىراق سيپات العان ەكەن. بۇل قۇبىلىس كەيبىر جەرلەردە جىلدىق جاۋىن-شاشىننىڭ قىسقا مەرزىمدە جاۋاتىنىن جانە قۇرعاقشىلىق ۇزاققا سوزىلعان ايماقتاردا كەرىسىنشە قالىڭ نوسەردىڭ جاۋۋىنان كورىنىس تابادى.
1900 جىلداردان باستاپ جاۋىن-شاشىننىڭ وزگەرمەلىلىگى ەۋروپادا، اۆستراليادا جانە سولتۇستىك امەريكانىڭ شىعىسىندا انىق بايقالىپپ وتىر. جاۋىن-شاشىننىڭ وزگەرمەلىلىگىنىڭ ارتۋى نەگىزىنەن اۋا تەمپەراتۋراسى مەن ىلعالدىلىقتىڭ جوعارىلاۋىنا، سونداي-اق، جاۋىن-شاشىننىڭ قارقىندى بولۋىنا اكەلگەن پارنيكتى گازداردىڭ اتموسفەراعا ءبولىنۋ مولشەرىنە بايلانىستى. ونەركاسىپتىك توڭكەرىستەن بەرى جەر سەلسيا بويىنشا 1،5 گرادۋس جىلىندى؛ ال بۇل جايت اتموسفەرانىڭ تومەنگى قاباتىنداعى سۋ بۋىنىڭ مولشەرىنىڭ 10 پايىزعا ارتۋىنا ىقپال ەتكەن.