يزرايل اسكەري كۇشتەرى يرانداعى اسكەري نىساندارعا «ءدال سوققى» جاساعانىن مالىمدەدى، دەپ حابارلايدى BBC News.
ساحال تۇنگى ساعات 2 شاماسىندا «يران رەجيمىنىڭ يزرايلگە قارسى تۇراقتى شابۋىلدارىنا» جاۋاپ رەتىندە يرانداعى اسكەري نىساندارعا ءدال سوققىلار جاسالعانىن جاريالادى.
ءيزرايلدىڭ يرانعا بەرگەن بۇل جاۋابى تەگەراننىڭ 1 قازاندا يزرايلگە جاپپاي شابۋىل جاساپ، 200-گە جۋىق بالليستيكالىق زىمىران اتۋىنان كەيىن جاسالعان جوسپارلى ارەكەت ەدى. بۇل شابۋىل ءيزرايلدىڭ بەيرۋتتەگى «حەزبوللا» توبىنىڭ شتاب-پاتەرىنە جاساعان سوققىسىنان قازا تاپقان «حەزبوللا» جەتەكشىسى حاسان ناسراللانىڭ ولىمىنە جاۋاپ رەتىندە بولدى.
ءيزرايلدىڭ جاۋاپ شابۋىلىنىڭ تولىق اۋقىمى ءالى انىقتالماعانىمەن، ءيزرايلدىڭ قوعامدىق تەلەارناسى ونداعان جويعىش ۇشاق يراننىڭ اسكەري نىساندارىنا سوققى جاساعانىن حابارلادى، دەپ جازدى Reuters.
يراننىڭ Fars اقپارات اگەنتتىگى تەگەراننىڭ باتىسى مەن وڭتۇستىك-باتىسىنداعى بىرنەشە اسكەري بازانىڭ ءيزرايلدىڭ شابۋىلىنا ۇشىراعانىن راستادى.
NBC News جانە ABC News حابارلاۋىنشا، ءيزرايلدىڭ شابۋىلدارىنا ەنەرگەتيكالىق ينفراقۇرىلىم نەمەسە يادرولىق نىساندار كىرمەگەن، دەپ مالىمدەدى يزرايلدىك شەنەۋنىك.
ءيزرايلدىڭ 12 تەلەارناسىنىڭ مالىمەتىنە سايكەس، سوققىلاردىڭ نەگىزگى نىساناسى – يراننىڭ قورعانىس ونەركاسىبىنىڭ ورتالىق اسكەري نىساندارى، سونىڭ ىشىندە زىمىران زاۋىتتارى، ۇشقىشسىز ۇشاقتاردى ازىرلەۋ جانە ءوندىرۋ نىساندارى، سونداي-اق بالليستيكالىق زىمىرانداردى ۇشىرۋ بازالارى بولدى.
يراننىڭ مەملەكەتتىك تەلەارناسى تەگەران ماڭىندا «كۇشتى جارىلىس» بولعانىن حابارلادى.