حالىقارالىق ىزدەۋدە جۇرگەن ادام «الماتى-ماسكەۋ» باعىتىنداعى اۋە رەيسىنە تىركەلۋ كەزىندە ۇستالدى
بۇگىن كولىك پوليسەيلەرى شەكارا قىزمەتىمەن بىرلەسىپ «تبيليسي-استانا» باعىتىنداعى اۋە رەيسى ۇشىپ كەلىسىمەن 42 جاستاعى گرۋزيا ازاماتىن ۇستادى، دەپ حابارلايدى Almaty-akshamy.kz.
وعان 2021 جىلدىڭ قىركۇيەگىندە رەسەي فەدەراسياسىنىڭ يركۋتسك اۋداندىق سوتىنىڭ قاۋلىسىمەن رف قىلمىستىق كودەكسىنىڭ 264-بابىنىڭ 5-بولىگى، ياعني ەكى نەمەسە ودان دا كوپ ادامنىڭ ابايسىزدا ولىمىنە اكەپ سوقتىرعان جول قوزعالىسى مەن كولىك قۇرالدارىن پايدالانۋ ەرەجەلەرىن بۇزۋ بويىنشا قىلمىس جاساعانى ءۇشىن مەملەكەتارالىق ىزدەۋ جاريالانعان.
ءدال وسى كۇنى حالىقارالىق ىزدەۋدە جۇرگەن تاعى ءبىر ادام «الماتى-ماسكەۋ» باعىتىنداعى اۋە رەيسىنە تىركەلۋ كەزىندە ۇستالدى.
كۇدىكتى وزبەكستان رەسپۋبليكاسى قىلمىستىق كودەكسىنىڭ 168-بابىنىڭ 1-بولىگى، ياعني الاياقتىق بويىنشا حالىقارالىق ىزدەۋدە بولعان.
كولىك پوليسياسى دەپارتامەنتىنىڭ مالىمەتىنشە، قازىرگى ۋاقىتتا ۇستالعان ازاماتتار ۋاقىتشا ۇستاۋ يزولياتورىنا قامالعان.