ونىڭ پىكىرىنشە، قوعامدا قالىپتاسقان كەيبىر الەۋمەتتىك نورمالاردى وزگەرتكەن ءجون.
65 مەملەكەت بالاعا دەنە جاراقاتىن سالۋعا زاڭمەن تىيىم سالعان، دەپ حابارلايدى Almaty-akshamy.kz
بۇۇ قازاقستانداعى بالالار قورىنىڭ وكىلى ارتۋر ۆان ديزەن قازاقستاندا بالالارعا قول كوتەرۋگە زاڭمەن تىيىم سالۋ كەرەگىن ايتتى.
«بۇل بالالار اراسىنداعى زورلىق-زومبىلىق پەن ولارعا ۇلكەندەر تاراپىنان جاسالاتىن زورلىق-زومبىلىققا قاتىستى. ونىڭ سالدارى اۋىر. سوندىقتان وسىنى وتباسىلارعا ءتۇسىندىرۋ كەرەك. مىسالى، «مەن وسىلاي تاربيەلەندىم، وسىلاي ءوستىم. مەن دە بالامدى وسىلاي تاربيەلەيمىن» دەپ ويلاۋدىڭ قاجەتى جوق. بالانى داۋىس جانە قول كوتەرمەي-اق تاربيەلەۋگە جانە وسىرۋگە بولادى. مۇنى اتا-انالارعا جەتكىزۋ ءۇشىن ءتيىستى كوممۋنيكاسيالىق كامپانيا كەرەك، - دەدى ارتۋر ۆان ديزەن وكق-دا وتكەن دوڭگەلەك ۇستەلدە.
يۋنيسەف وكىلى قازاقستاندا بالالاردى ۇرۋعا زاڭمەن تىيىم سالۋدى ۇسىندى.
«دەنە جاراقاتىن سالۋعا زاڭمەن تىيىم سالۋ – وتە ماڭىزدى. بۇگىندە 65 مەملەكەت دەنە جاراقاتىن سالۋعا زاڭمەن تىيىم سالدى. تاعى 27 ەل بۇل زاڭعا قوسىلۋدى جوسپارلاپ وتىر. ونىڭ اراسىندا قازاقستاننىڭ كورشىلەرى دە بار. سوندىقتان وتباسىندا دا، وتباسىنان تىس جەرلەردە دە دەنە جاراقاتىنا تايىم سالۋ ماڭىزدى بولىپ وتىر... ءبىز بالالارعا زورلىق-زومبىلىق جاسالۋىنا، ولاردى ۇرىپ-سوعۋعا جول بەرمەۋىمىز كەرەك. بۇل – قوعام الدىنداعى مىندەتىمىز»، - دەدى ول.
دوڭگەلەك ۇستەلگە قاتىسقان ءىىم اكىمشىلىك پوليسيا كوميتەتى ءتوراعاسىنىڭ ورىنباسارى رەنات زۋلحايروۆ قازاقستاندا بالالاردىڭ قۇقىعى زاڭمەن قورعالاتىنىن، ولاردى ۇرعاندار زاڭ اياسىندا قىلمىستىق جانە اكىمشىلىك جاۋاپكەرشىلىككە تارتىلاتىنىن اتاپ ءوتتى.