يۋليا پۋتينسيەۆا ريم ماستەرس ءتۋرنيرىنىڭ ەكىنشى اينالىمىنا شىقتى

ماچ اسا تارتىستى ءوتىپ، ءۇش سەتكە سوزىلدى

قازاقستاننىڭ ەكىنشى، الەمنىڭ 51-راكەتكاسى يۋليا پۋتينسيەۆا ريم WTA 1000 ءتۋرنيرىنىڭ ەكىنشى اينالىمىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىق سپورتشى العاشقى اينالىمدا رەيتينگىدە 76-ورىندا تۇرعان بولگاريالىق ۆيكتوريا توموۆامەن شەبەرلىك بايقاستى.

ماچ اسا تارتىستى ءوتىپ، ءۇش سەتكە سوزىلدى. ءبىرىنشى پارتيادا تاي-برەيكتە بولگاريالىق سپورتشى باسىمدىلىق تانىتتى – 7:6 (7:5). ەكىنشىسىندە يۋليا ەسە قايىردى – 7:6 (7:3). ءۇشىنشى، شەشۋشى سەتتە پۋتينسيەۆا بەت قاراتقان جوق – 6:0.

ءۇش ساعاتقا جۋىق ۋاقىتقا سوزىلعان باسەكە بارىسىندا يۋ.پۋتينسيەۆا 2 ەيس جاساپ، 18 برەيك-پوينتتىڭ 8ء-ىن پايدالاندى. قارسىلاسى 5 برەيكتەن (14 برەيك-پوينت) اسا المادى.

يۋليا پۋتينسيەۆا ءۇشىنشى اينالىمعا شىعۋ ءۇشىن الەمنىڭ 5-راكەتكاسى، امەريكالىق كوري گاۋفپەن تالاسادى.

قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا ەكىنشى اينالىمدا رەيتينگتە 65-ساتىداعى يتاليالىق ياسمين پاولينيمەن وينايدى.

ەسكە سالا كەتەيىك، بۇدان بۇرىن تەننيستەن الەم چەمپيوناتى ىرىكتەۋ تۋرنيرىندە قازاقستان جاسوسپىرىمدەرى اۋستراليامەن كەزدەسەتىنىن جازعان ەدىك.

سونداي-اق الەكساندر بۋبليك ريم ماستەرس ءتۋرنيرىن ءساتتى باستادى.