يۋليا پۋتينسيەۆا الەمنىڭ ەكس-ۇشىنشى راكەتكاسىن ۇتتى

تارتىستى ماچتا يۋ.پۋتينسيەۆا 6:7 (3:7)، 6:2، 6:4 ەسەبىمەن جەڭىسكە جەتتى

قازاقستاننىڭ ەكىنشى، الەمنىڭ 47-راكەتكاسى يۋليا پۋتينسيەۆا اقش-تا توپىراق توسەنىشىندە ءوتىپ جاتقان چارلستون WTA 500 ءتۋرنيرىن ءساتتى باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىق تەننيسشى العاشقى اينالىمدا الەمنىڭ بۇرىنعى ءۇشىنشى راكەتكاسى، ۋكراينالىق ەلينا سۆيتولينامەن شەبەرلىك بايقاستى.

بۇل ە.سۆيتولينانىڭ ءسابيلى بولۋىنا بايلانىستى ءبىر جىلدان استام ۋاقىتتان كەيىن كورتقا ءبىرىنشى شىعۋى ەدى.

قارسىلاستاردىڭ وسىعان دەيىن جەتى مارتە جولدارى توقايلاسىپ، سونىڭ التاۋىندا ۋكراينالىق، بىرەۋىندە عانا قازاقستاندىق سپورتشى جەڭگەن بولاتىن. WTA دودالارىندا 16 رەت چەمپيون اتانعان ە.سۆيتولينانىڭ توكيو وليمپياداسىندا قازاقستاندىق ەلەنا رىباكينانى ۇتىپ، قولا جۇلدەگە يە بولعانى بەلگىلى.

بۇل جولى اسا تارتىستى ماچتا يۋ.پۋتينسيەۆا 6:7 (3:7)، 6:2، 6:4 ەسەبىمەن جەڭىسكە جەتتى.

ءۇش ساعاتقا جۋىق ۋاقىتقا سوزىلعان باسەكە بارىسىندا يۋليا 2 ەيس جاساپ، 24 برەيك-پوينتتىڭ جەتەۋىن ءوز پايداسىنا جازدى. قارسىلاسى 5 ەيس، 4 برەيكپەن (11 برەيك-پوينت) كوزگە ءتۇستى.

يۋليا پۋتينسيەۆا ءۇشىنشى اينالىمعا شىعۋ ءۇشىن الەمنىڭ 17ء-ىنشى، وسى جارىستىڭ 7-راكەتكاسى، رەسەيلىك ەكاتەرينا الەكساندروۆامەن تالاسادى.

جۇلدە قورى 780 637 اقش دوللارىنا باعالانعان دودا 9 ساۋىردە مارەسىنە جەتەدى.