بۇل تۋرالى سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى زاۋرە احمەتوۆا ايتتى.
قۇتىرۋ – ورتالىق جۇيكە جۇيەسىن زاقىمدايتىن ۆيرۋستىق اۋرۋ. ادامدارداعى قۇتىرما اۋرۋىنىڭ 99 پايىزى يتتەر ارقىلى جۇعادى. قۇتىرۋ اۋرۋىنىڭ قۇرباندارى كوبىنە 5 جاستان 14 جاسقا دەيىنگى بالالار. كلينيكالىق سيمپتومدار ساتىسىندا قۇتىرۋ اۋرۋىنىڭ ءولىمى – 100 پايىز، دەپ حابارلايدى aqshamnews.kz.
"بيىل رەسپۋبليكا بويىنشا ادامدار اراسىندا قۇتىرما اۋرۋى تىركەلگەن جوق. ءبىراق 2019-2022 جىلدار ارالىعىندا قۇتىرما اۋرۋىنان 6 جاعداي تىركەلدى. ونىڭ ىشىندە 3 بالا اۋىرعان. قۇتىرما اۋرۋىنا جانۋارلاردىڭ قاۋىپ العانى سەبەپ بولعان. بارلىق جاعدايدا ناۋقاستار مەديسينالىق كومەككە سيمپتومدار پايدا بولعاننان كەيىن عانا جۇگىنگەن. بارلىق ناۋقاس قۇتىرما اۋرۋىنان قايتىس بولدى"، - دەدى زاۋرە احمەتوۆا.
سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى جىل سايىن رەسپۋبليكا بويىنشا 50 مىڭنان استام ادام جانۋارلاردىڭ تىستەپ العانىنان مەديسينالىق كومەككە جۇگىنەتىنىن ايتتى. ونىڭ 99 پايىزى پروفيلاكتيكالىق ۆاكسيناسيا الادى، ال 1 پايىزى ودان باس تارتادى.
2024 جىلى 10 ايدا مەديسينالىق كومەككە جۇگىنگەن ادامدار سانى – 44 266. ونىڭ ىشىندە 32 345 ادامدى يت قاۋىپ العان. مەديسينالىق كومەككە جۇگىنگەندەر اراسىندا 14 جاسقا دەيىنگى بالالاردىڭ سانى – 17 078، - دەپ ايتتى ول.
بۇگىن ءماجىلىستىڭ ەكولوگيا ماسەلەلەرى جانە تابيعاتتى پايدالانۋ كوميتەتى جانۋارلارعا جاۋاپكەرشىلىكپەن قاراۋ تۋرالى زاڭ جوباسى بويىنشا دوڭگەلەك ۇستەل وتكىزىپ جاتىر.