قازاقستان رەسپۋبليكاسىنىڭ باس پروكۋراتۋراسى مەملەكەت باسشىسىنىڭ تاپسىرمالارىن ورىنداۋ ماقساتىندا قۇقىق قورعاۋ جانە ارنايى ورگاندارمەن بىرلەسىپ، ناشاقورلىق پەن ەسىرتكى ساۋداسىنا قارسى كەشەندى شارالار قابىلداۋدا. وسى جۇمىستار اياسىندا 75 ەسىرتكى زەرتحاناسىنىڭ قىزمەتى توقتاتىلىپ، 87 ادام، سونىڭ ىشىندە مولدوۆا، لاتۆيا، ءۇندىستان جانە باسقا دا ەلدەردىڭ ازاماتتارى ۇستالدى. 1،3 توننادان استام سينتەتيكالىق ەسىرتكى تاركىلەندى، دەپ حابارلايدى aqshamnews.kz.
قۇقىق قورعاۋ ورگاندارى ەسىرتكى ساۋداسىمەن اينالىساتىن 13 قىلمىستىق توپتىڭ، ونىڭ ىشىندە ەكى ترانسۇلتتىق قىلمىستىق توپتىڭ ارەكەتىن اشكەرەلەدى. سونىمەن قاتار، «ناشاقورلىققا جول جوق» اتتى ەسىرتكىگە قارسى ءىس-شارالار تۇراقتى تۇردە وتكىزىلىپ كەلەدى. ناتيجەسىندە ەسىرتكى ناسيحاتتاعانى ءۇشىن 17 ادام ۇستالىپ، 10 مىڭنان استام ناركو-گراففيتي جويىلدى.
زاماناۋي تەحنولوگيالاردىڭ دامۋى ەسىرتكى ساتۋشىلاردىڭ ينتەرنەت-پلاتفورمالاردى پايدالانۋ ارقىلى زاڭنان تىس ارەكەتتەرىن جاسىرۋىنا مۇمكىندىك بەرگەن. وسىعان بايلانىستى ءتارتىپ ساقشىلارى كوبىنەسە تەك ەسىرتكى تاراتۋشىلاردى (زاكلادچيكتەردى) عانا ەمەس، سونىمەن قاتار قىلمىستىق يەرارحيانىڭ جوعارعى دەڭگەيىندەگى ۇيىمداستىرۋشىلاردى دا اشكەرلەۋگە كىرىستى. قازىرگى ۋاقىتتا ەسىرتكى ساۋداسىنان تۇسكەن زاڭسىز تابىستى باقىلاپ وتىرعان «كۋراتورلار» مەن ەسىرتكى بيزنەسىنىڭ باسقا دا ۇيىمداستىرۋشىلارى ۇستالدى.
قۇقىق قورعاۋ ورگاندارى ەسىرتكى بيزنەسىنىڭ ءاربىر بۋىنىن انىقتاۋعا بەل بۋعان. بۇل ماقساتتا ەسىرتكى جارنامالاۋشىلارىنان باستاپ، ەسىرتكى ساۋداسىن ۇيىمداستىرۋشىلارعا دەيىنگى بارلىق دەڭگەيدەگى قىلمىسكەرلەردىڭ ارەكەتتەرى انىقتالۋدا.
باس پروكۋراتۋرا ازاماتتاردى ەسىرتكى تۇتىنۋدان جانە ەسىرتكى بيزنەسىنە قاتىسۋدان ساق بولۋعا شاقىرادى. زاڭ مەن ءتارتىپتىڭ ۇستەمدىگى قوعام مەن ءاربىر ازاماتتىڭ قاۋىپسىزدىگىن قامتاماسىز ەتەدى. وسى قاعيدات ساقتالعان جاعدايدا عانا ءبىز ءادىل، تازا جانە ءقاۋىپسىز قازاقستاندى قۇرا الامىز.