قازاقستان مەن يتاليا اراسىنداعى تاۋار اينالىمى 2021 جىلى 9،5 ملرد دوللارعا دەيىن ءوستى.
اپەننين تۇبەگىنەن ەلىمىزگە قۇيىلعان تىكەلەي شەتەلدىك ينۆەستيسيا كولەمى 123 ملن دوللارعا جۋىقتاعان. تاراپتار وسى كورسەتكىشتى ۇلعايتۋدى كوزدەپ وتىر. بۇل ق ر پرەمەر-مينيسترىنىڭ ورىنباسارى، سىرتقى ىستەر ءمينيسترى مۇحتار تىلەۋبەردىنىڭ يتاليانىڭ ساياسي جانە ىسكەر توپتارىمەن كەلىسسوزدەرىنىڭ قورىتىندىسىندا بەلگىلى بولدى، دەپ حابارلايدى Almaty-akshamy.kz
ايتا كەتەيىك، ءقازىردىڭ وزىندە 200 يتاليالىق كومپانيا مۇناي-گاز سەكتورىندا، قۇرىلىستا، ينفراقۇرىلىمدى دامىتۋدا جانە ەنەرگەتيكادا جۇمىس ىستەۋدە. سونىمەن قاتار، ەۋروپالىق كاسىپكەرلەر تاماق جانە وڭدەۋ ونەركاسىبى، كولىك جانە لوگيستيكا، اۋىل شارۋاشىلىعى، ماشينا جاساۋ جانە جاسىل ەنەرگەتيكا سالالارىندا بىرلەسكەن جوبالاردى دامىتۋعا قىزىعۋشىلىق تانىتۋدا.
"يتاليالىق كومپانيالار قازاقستانداعى جوبالارعا ينۆەستيسيا سالعان سەكسيا ەرەكشە قىزىعۋشىلىق تۋدىردى. اسىرەسە گەوساياسي جاعدايعا بايلانىستى بەلگىلى ءبىر قيىندىقتارعا تاپ بولعان جانە ءوز بيزنەسىن رەسەيدەن باسقا ەلدەرگە كوشىرۋگە نيەتتى كومپانيالار اراسىندا اسا سۇرانىسقا يە بولدى. سونىمەن قاتار، ىنتىماقتاستىقتىڭ كەلەشەگىن تالقىلادىق جانە ينۆەستيسيالىق كليمات اياسىندا ۇسىنا الاتىن بارلىق جەڭىلدىكتەردى تانىستىردىق"، - ق ر پرەمەر-مينيسترىنىڭ ورىنباسارى – دەدى سىرتقى ىستەر ءمينيسترى مۇحتار تىلەۋبەردى.
"سانكسيالار يتاليا ەكونوميكاسى مەن بيزنەسىنە اسەر ەتەدى. ءبىزدىڭ ۇكىمەت ساۋدا اگەنتتىكتەرىن قولداپ، وزگە نارىقتاردا جاڭا مۇمكىندىكتەر ىزدەستىرۋدە. بۇل قازاقستانعا ەكسپورتتاۋ نەمەسە ينۆەستيسيا سالۋ مۇمكىندىگى بار دەگەن ءسوز. ءبىز يتاليالىق كومپانيالاردىڭ جەتكىزۋ نارىقتارىن ءارتاراپتاندىرۋىن قالايمىز. وسى رەتتە قازاقستان اسا قىزىقتى نارىق"، - دەدى يتاليا ساۋدا جانە ينۆەستيسيالىق اگەنتتىگىنىڭ ديرەكتورى روبەرتو لۋونگو.
ەكىجاقتى ىنتىماقتاستىقتى كەڭەيتۋدەگى تاعى ءبىر ماڭىزدى قادام – قازاقستان مەن يتاليا اراسىندا تىكەلەي اۋە قاتىناسىنىڭ اشىلۋى. 12 ماۋسىمنان باستاپ ميلان-الماتى باعىتىندا تۇراقتى رەيس ىسكە قوسىلدى. ساراپشىلاردىڭ ايتۋىنشا، رەيستەردىڭ كوروناۆيرۋستىق پاندەميادان كەيىن تۋريزم سالاسىن قالپىنا كەلتىرۋدەگى ىقپالى زور بولماق.