IT تەحنولوگيانى يگەرۋ تەتىكتەرى تالقىلاندى.
ايەلدەر ىستەرى جانە وتباسىلىق-دەموگرافيالىق ساياسات ءجونiندەگi ۇلتتىق كوميسسيا الاڭىندا ايەلدەردىڭ سيفرلىق ەكونوميكاداعى مۇمكىندىكتەرىن دامىتۋ جانە ايەلدەر مەن بالالار ءۇشىن الەۋمەتتىك ماڭىزى بار IT-جوبالاردى پراكتيكاعا ەنگىزۋ ماسەلەلەرى پىسىقتالدى، دەپ حابارلايدى Almaty-akshamy.kz.
ۇلتتىق كوميسسيانىڭ ءتوراعاسى ايدا بالايەۆا وسى سالاداعى مەجەلەگەن مىندەتتەردى ورىنداۋ ماڭىزدى دەيدى.
«بۇل جۇمىستىڭ باستى باسىمدىقتارى - سەرىكتەستىك ءۇشىن جاعدايلاردى كەڭەيتۋ، قۇندى تالانتتاردى انىقتاۋ جانە ايەلدەر باستامالارىنىڭ ەكونوميكالىق جانە الەۋمەتتىك الەۋەتىن ىسكە اسىرۋعا جاردەمدەسۋ. بۇل كەزدەسۋ - وسى ماسەلەلەردى شەشۋدەگى كەزەكتى قادام»، - دەدى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتوراعاسى ايدا بالايەۆا.
ەكىنشى سەسسيا اياسىندا قوعامدىق ماڭىزى بار ءتۇرلى ماسەلەلەردى شەشۋگە جانە الەۋمەتتىك كاسىپكەرلىكتى دامىتۋعا باعىتتالعان ءبىرقاتار جوبالار تانىستىرىلدى. سونىڭ ىشىندە، ءونلاين-بىلىم بەرۋدى كەڭەيتۋ، پەداگوگتاردىڭ بىلىكتىلىگىن ارتتىرۋ جانە مەكتەپتەردى سيفرلاندىرۋ، جاستاردى تاربيەلەۋ ماسەلەلەرى قامتىلدى. سونداي-اق ونكولوگيالىق اۋرۋلاردى انىقتاۋ جانە جۇكتىلىك پەن بوسانۋ كەزىندە ايەلدەردى ونلاين-قولداۋ بويىنشا يدەيالار ۇسىنىلدى.