الماتىداعى №176 مەكتەپ-گيمنازياسىندا وقۋشىلارعا ارنالعان موتيۆاسيالىق كەزدەسۋ ءوتتى. "ەڭبەك - ەڭسە كوتەرەدى" جوباسى اياسىندا وتكەن ماعىنالى كەزدەسۋدىڭ باس كەيىپكەرى IT سالاسىنىڭ ۇزدىگى ايبولات قۇلتاي بولدى.
ءوز ەڭبەگىمەن ەڭسە كوتەرگەن بىلىكتى مامانمەن كەزدەسۋگە مەكتەپتىڭ 10-11 سىنىپ وقۋشىلارى قاتىستى. ماماندىق تاڭداۋ الدىندا تۇرعان وقۋشىلار ءۇشىن ارنايى ۇيىمداستىرىلعان شارانى الماتى قالاسى قوعامدىق دامۋ باسقارماسى قوعامدىق دامۋ ورتالىعىنىڭ قولداۋىمەن ۇيىمداستىرعان بولاتىن.
كەزدەسۋ بارىسىندا IT مامانى ايبولات قۇلتاي ءوزىنىڭ ماماندىق تاڭداۋ كەزىندەگى جانە ستۋدەنتتىك كەزدەگى تاجىريبەلەرىمەن بولىسە وتىرىپ، تاڭداعان ماماندىعىنىڭ ومىرىنە قالاي اسەر ەتكەنىن باياندادى. ءارى ءوزىنىڭ IT جوبالارىنىڭ جاسالۋ بارىسىن، ولاردىڭ قىزمەتى مەن ناتيجەلەرىن، الداعى جوبا-جوسپارلارىمەن ءبولىستى.
"كەزدەسۋدە ءوز سالامنىڭ توڭىرەگىندە دامۋ تەندەنسيالارىن جاس جەتكىنشەكتەرگە تۇسىندىرسەم دەيمىن. IT جوبالارىمدى تانىستىرا وتىرىپ، بولاشاق مامان يەلەرىنىڭ بۇل سالاعا دەگەن تۇسىنىگىن، قىزىعۋشىلىعىن ارتتىرۋدى ماقسات ەتىپ كەلدىم. ءقازىر بۇل سالا بويىنشا قازاقستان دا الەم كوشىنەن شەتكەرى قالىپ جاتقان جوق، ءتىپتى كەيبىر ەۋروپالىق ەلدەردەن دە الدا كەتكەن جاقتارىمىز بار. جالپى، بۇل سالا بويىنشا ەلىمىزدە مۇمكىندىك وتە جوعارى. بۇل تۋرالى وقۋشىلار بىلسە جانە بولاشاق سۇرانىسى بار وسى سالاعا كوڭىل اۋدارسا دەگەن ءۇمىتىم بار،" – دەيدى ايبولات قۇلتاي.
اتالعان سالادا ەڭبەك ەتىپ كەلە جاتقان ازامات بۇعان دەيىن ەلگە بەلگىلى بولعان Aqyl Battle ءموبيلدى ينتەللەكتۋالدى ويىنى مەن @sez.app قوسىمشاسىنىڭ اۆتورى. ءارى Thousand IT كومپانياسىنىڭ نەگىزىن قالاۋشى.
"الەمدە دە، ەلىمىزدە دە IT ماماندارىنا دەگەن تاپشىلىق بايقالادى. ەلىمىزدە 2025 جىلدىڭ وزىندە 100 مىڭ IT مامانىنا دەگەن تاپشىلىق بولاتىنى بۇعان دەيىن مەملەكەت باسشىسى دا اتاپ وتكەنى بار. سوندىقتان ماماندىق تاڭداۋ الدىنداعى وقۋشىلاردىڭ بۇل سالاعا بەت بۇرۋى، قىزىعۋشىلىق تانىتۋى ماڭىزدى دەپ ويلايمىن،" – دەيدى سالا مامانى.
جوعارى سىنىپ وقۋشىلارى وزدەرىنە قاتىستى بۇل كەزدەسۋگە قىزىعۋشىلىق تانىتتى. كەيىپكەرمەن سۇراق-جاۋاپ بارىسىندا وقۋشىلاردىڭ وسى سالاعا دەگەن ىنتاسى جوعارى ەكەنى دە بايقالدى.
"ەڭبەك - ەڭسە كوتەرەدى" الەۋمەتتىك جوباسى اياسىندا مۇنداي كەزدەسۋلەر بۇعان دەيىن دە قالاداعى ءبىرقاتار مەكتەپتە وتكىزىلگەن. ۇيىمداستىرۋشى رەتىندە "جاۋھار" قوعامدىق قورىنىڭ جەتەكشىسى نۇريسلام يسمايىل جوبانىڭ باستى ءمانى مەكتەپ ءبىتىرۋ الدىنداعى وقۋشىلاردىڭ زاماناۋي سىن-قاتەرلەرگە بەيىمدىلىگىن ارتتىرىپ، بولاشاقتا تابىستى تۇلعاعا اينالۋىنا ىقپال ەتۋ دەپ سانايدى.