مەگاپوليستەگى مەملەكەتتىك ورتالىق مۋزەيى قازاقستاننىڭ «Asia Doll» قۋىرشاق شەبەرلەرىنىڭ شىعارماشىلىق وداعىمەن بىرلەسىپ، اۆتورلىق قۋىرشاقتار مەن تەددي قونجىقتارىنىڭ حالىقارالىق كورمەسىن اشتى. وندا ءارتۇرلى تەحنيكادا ورىندالعان 100-گە جۋىق اۆتورلىق جۇمىس ۇسىنىلدى.
كورمەنىڭ اشىلۋ سالتاناتىندا الماتىنىڭ بەلگىلى سۋرەتشىلەرى، گالەريستەرى بوي كورسەتتى. بيىلعى كورمەگە الماتى، وسكەمەن، ريددەر، كوكشەتاۋ، تاراز، پاۆلودار، استانا، سەمەي، ورال، التاي (قازاقستان)، بىشكەك (قىرعىزستان)، تاشكەنت (وزبەكستان) قالالارىنان 50-دەن استام شەبەر قاتىستى. ولار ونەردى سۇيەتىن كورەرمەندەرىنىڭ نازارىنا پوليمەرلى سازدان، ماتادان جانە كيىزدەن جاسالعان سان الۋان اۆتورلىق قۋىرشاقتارىن ۇسىندى. كورمە قۋىرشاق جاساۋ ونەرىنىڭ زاماناۋي باعىتتارى مەن ەرەكشەلىكتەرىن پاش ەتىپ، قازاقستان مەن تمد ەلدەرىنىڭ قۋىرشاق جاسايتىن شەبەرلەرىنىڭ كوللەكسيالارىمەن جانە جۇمىستارىمەن تانىستىردى.
كورمە اياسىندا «جىبەك جولىنىڭ التىن عاسىرى» ۇزاق مەرزىمدى جوباسى ۇسىنىلدى. وندا جىبەك جولى بويىنداعى ەلدەردىڭ تاڭعاجايىپ كەيىپكەرلەرى، ەتنيكالىق كيىمدەرى، جانۋارلارى مەن ادامدارىنىڭ بەينەلەرىن كورسەتەتىن اۆتورلىق شىعارمالارى ەرەكشە ىقىلاسقا بولەندى.
كورمەنى ۇيىمداستىرۋشى، قازاقستان «Asia Doll» قۋىرشاق شەبەرلەرى شىعارماشىلىق وداعىنىڭ جەتەكشىسى تاتيانا سەمونوۆا «جىبەك جولى» جوباسى ۇلتتىق تاقىرىپتاعى تۋىندىلاردى قامتيتىنىن اتاپ ءوتتى.
«شەبەرلەر ادامداردىڭ جىبەك ماتالار، باعالى تاستار بولعان سوناۋ كەزەڭدە قالاي كيىنگەنىن، ول تۇستا دا تالعامنىڭ جوعارى بولعانىن كورسەتۋگە تىرىستى. ءار قۋىرشاق بەينەسى تاريحپەن بايلانىستى، ءارقايسىسى تەرەڭ زەرتتەلگەن»، – دەدى ول.
ءيا، كورمە تورىنەن ورىن العان قۋىرشاقتار سارتىلداعان ستانوكتان جاسالىپ شىققان بىر-بىرىنە ۇقساس تۋىندىلار ەمەس، ولار شەبەرلەردىڭ كوز مايىن تاۋىسا وتىرىپ، بىرنەشە اي بويى جاساعان بەينەلەرى. ءبىر دانامەن عانا شىققان ءار قۋىرشاقتىڭ جاسالۋ تەحنيكاسى دا، تاقىرىبى دا بولەك. ماسەلەن، ءبىر قۋىرشاق شاتتانىپ تۇرسا، ەكىنشىسىنىڭ كوزىندە مۇڭ بار. ءۇشىنشىسى بۇزىقتاۋ، ال ءتورتىنشىسى ەركەلەۋ. شەبەرلەردىڭ جۇمىسىندا كوركەمدىك پەن تەحنيكا ەرەكشە ۇيلەسىم تاپقان. ياعني، ءار قۋىرشاقتا ادامنىڭ ءھام شەبەردىڭ جانى بار. ال بىزگە اق جاۋلىقتى اجەسىنىڭ جىپ-جىلى ارقاسىندا ماۋجىراپ ۇيقى قىسىپ كەلە جاتقان نەمەرە ادەمى اسەر قالدىردى.
كورمەنىڭ ماقساتى – الماتىلىقتارعا جانە قالا قوناقتارىنا ەلىمىزدەگى دارىندى شەبەرلەردى تانىستىرۋ. قۋىرشاق شەبەرلەرىنىڭ كوز مايىن تاۋىسىپ ومىرگە اكەلگەن تۋىندىلارى كورۋگە تۇرارلىق.
راشيدا حاريپوۆا، ق ر مەملەكەتتىك ورتالىق مۋزەيىنىڭ ديرەكتورى:
– بۇرىنعىلار بۇگىنگىدەي ءتۇرلى قىزىلدى-جاسىلدى اشەكەي بۇيىمدار بولماعان زاماندا قۋىرشاقتى قولدان تىگىپ، ءىشىن شوپپەن، ماتامەن تولتىرىپ، كوزىن جىپتەن تىگىپ، اعاشتان دا جونىپ جاساپ، بالاسىن قۋانتۋعا، ويناتۋعا، ءوي-ورىسىن دامىتۋعا ۇمتىلعان. بىردە ءبىر پسيحولوگپەن تىلدەسىپ قالعانىم بار. قۇربىسىنىڭ بەس جاسار قىزى مۇلدەم سويلەمەيدى ەكەن. سودان تانىسىنا بالاسىنىڭ ەڭ سۇيىكتى قۋىرشاعىمەن ارا-قاتىناسىنا ءمان بەرۋگە كەڭەس ايتادى. ءبۇلدىرشىن كۇنى-تۇنى سول قۋىرشاعىمەن بىرگە بولىپ، بىرگە ۇيىقتاپ، بىرگە ويانىپ، بىرگە تاماقتانىپ، بىلدىرلاپ سويلەسۋدى ادەتكە اينالدىرعانىنىڭ ناتيجەسىندە ءتىلى شىعادى. دەمەك، قۋىرشاق تا بىزگە دوس، سەرىك بولا الادى دەگەن ءسوز. قۋىرشاق ويىنشىق قانا ەمەس، بۇل – ونەر. ول مادەنيەت پەن داستۇرلەردى جانداندىرۋ، سونداي-اق بىزگە وتكەن ءداۋىردىڭ ەرەكشە بەينەلەرىن جەتكىزۋ ءتاسىلى دەسەك، قاتەلەسپەيمىز. ماسەلەن، مىنا «توميريس» قۋىرشاعىنان سول زاماننىڭ ەنەرگەتيكاسىن سەزىنۋگە بولادى. جاس ۇرپاق تاريحي بەينەدەگى قۋىرشاق پەن ونىڭ وقۋلىقتاعى تۇلعاسىن سالىستىرۋ ارقىلى تاريحىمىزعا دەگەن قىزىعۋشىلىعى ويانۋى مۇمكىن. سوندىقتان بۇل كورمەدەگى ۇلى جىبەك جولى بويىندا ءومىر سۇرگەن ءارتۇرلى حالىقتىڭ كەيىپكەرلەرىمەن تانىسۋعا مۇمكىندىك بەرەتىن «جىبەك جولىنىڭ التىن عاسىرى» جوباسىنىڭ بىرەگەيلىگىن ەرەكشە اتاپ وتكىم كەلەدى.