پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ ۇكىمەتكە IT قىزمەتتەردىڭ ەكسپورتىن ءبىر ميلليارد دوللارعا جەتكىزۋدى تاپسىردى.
«وزدەرىڭىز بىلەسىزدەر، مەن سيفرلاندىرۋ مەن يننوۆاسيالاردى ەنگىزۋ ماسەلەسىنە كوپ كوڭىل بولەمىن. ءبىزدىڭ الدىمىزدا قازاقستاندى IT ەلگە اينالدىرۋ دەيتىن ماڭىزدى ستراتەگيالىق مىندەت تۇر. سيفرلاندىرۋ سالاسىندا جەتىستىكتەرىمىز بار. ەلەكتروندى ۇكىمەت پەن فينتەحتى دامىتۋ يندەكسى بويىنشا الەمدە كوشباسشىلار قاتارىندامىز»، - دەدى مەملەكەت باسشىسى.
قاسىم-جومارت توقايەۆ ەلدەگى IT سالانىڭ ەكسپورت كولەمى وتكەن جىلى عانا بەس ەسە وسكەنىن اتاپ ءوتتى.
«جىل سوڭىنا دەيىن بۇل كورسەتكىش 500 ميلليون دوللارعا جەتۋى مۇمكىن. ءبىراق مۇنىمەن شەكتەلمەۋىمىز كەرەك. ۇكىمەتتىڭ الدىنداعى جاڭا مىندەت – 2026 جىلعا قاراي IT قىزمەتتەردىڭ ەكسپورتىن ءبىر ميلليارد دوللارعا جەتكىزۋ. بۇعان ءىرى شەتەلدىك IT كومپانيالارمەن بىرلەسكەن كاسىپورىندار اشۋ جاردەمدەسەدى. ۇكىمەت بۇل ماسەلە بويىنشا ەگجەي-تەگجەيلى ۇسىنىستار ەنگىزۋى كەرەك»، - دەدى پرەزيدەنت.