يسلام دامۋ بانكى قازاقستاننىڭ سۋ سالاسىنا $1،15 ملرد كولەمىندە ينۆەستيسيا سالادى. بۇل كەلىسىم باكۋدە وتكەن بۇۇ-نىڭ كليماتتىڭ وزگەرۋى جونىندەگى (COP29) كونفەرەنسياسىندا بەكىتىلدى، دەپ حابارلايدى aqshamnews.kz
پرەمەر-مينيستردىڭ ورىنباسارى جانە ۇلتتىق ەكونوميكا ءمينيسترى نۇرلان بايبازاروۆ بۇل يسلام دامۋ بانكىنىڭ تاريحىنداعى ەڭ ءىرى قارجىلاندىرۋ جوباسى ەكەنىن ەرەكشە اتاپ ءوتتى.
بۇعان قوسا، يسلام دامۋ بانكى قازاقستاننىڭ سۋ سەكتورىن دامىتۋعا $3،5 ملن كولەمىندە قايتارىمسىز گرانت ءبولدى.
يسلام دامۋ بانكى قازاقستان سۋ رەسۋرستارى جانە يرريگاسيا مينيسترلىگى ازىرلەگەن «كليمات وزگەرىسىنە بەيىمدەلگەن سۋ رەسۋرستارىن دامىتۋ» جوباسىن جۇزەگە اسىرۋعا اتسالىساتىن بولادى. تاراپتار بۇعان دەيىن جوبانىڭ ءبىرىنشى كەزەڭى بويىنشا كەلىسىمگە قول قويعان ەدى.
جوبانىڭ ءبىرىنشى كەزەڭىندە استانا سۋ قويماسىن تولىقتىرۋدى قوسا العاندا، ءتورت جاڭا سۋ قويماسىن سالۋ جانە جۇمىس ىستەپ تۇرعان ءتورت سۋ قويماسىن قايتا قۇرۋ، سونداي-اق 115 كانالدى جوندەۋ مەن قايتا جاڭارتۋ كوزدەلگەن. بۇل جۇمىستار اقمولا، الماتى، جامبىل، قىزىلوردا، تۇركىستان، باتىس قازاقستان، جەتىسۋ وبلىستارىندا جانە استانا قالاسىندا جۇرگىزىلەدى.
سونداي-اق جوبا اياسىندا يسلام دامۋ بانكى مەن قازاقستان سۋ شارۋاشىلىعى عىلىمي-زەرتتەۋ ينستيتۋتى اراسىندا سۋ جانە وزەن باسسەيندەرىنىڭ ماسەلەلەرىن زەرتتەۋگە قاتىستى تەحنيكالىق ىنتىماقتاستىق ورناتۋ، سۋ رەسۋرستارىنىڭ اقپاراتتىق-تالداۋ ورتالىعىنا ەرتە ەسكەرتۋ جۇيەلەرىن ەنگىزۋ قاراستىرىلعان.
سونىمەن بىرگە، «قازسۋشار» رەسپۋبليكالىق مەملەكەتتىك كاسىپورنىن تەحنيكالىق تۇرعىدان جابدىقتاۋ جانە سۋ رەسۋرستارىن باسقارۋ پروسەسىن جەتىلدىرۋ ماقساتىندا اۆتوماتتاندىرۋ ورتالىعىن قۇرۋ جوسپارلانۋدا.
«مەملەكەت باسشىسى سۋ سالاسىنا ينۆەستيسيا تارتۋدىڭ ماڭىزدىلىعىن بىرنەشە رەت اتاپ وتكەن بولاتىن. بىزگە سۋ ينفراقۇرىلىمىن جاڭعىرتۋ جانە كليماتتىق وزگەرىستەرگە بەيىمدەۋ مىندەتى جۇكتەلگەن. يسلام دامۋ بانكى سىندى بەدەلدى ينستيتۋتتىڭ قارجىلاندىرۋى قازاقستاننىڭ ينۆەستيسيالىق ساياساتى مەن الەۋمەتتىك-ەكونوميكالىق رەفورمالارىنا جوعارى سەنىمنىڭ ايعاعى»، — دەدى نۇرلان بايبازاروۆ.