مەملەكەتتىك كەڭەسشى ەرلان قارين Telegram-دا ىشكى ساياسي تۇرعىدا ءوتىپ بارا جاتقان جىل نەسىمەن ەستە قالعانىن جازدى.
رەفورمالاردى جالعاستىرۋ
مەملەكەت باسشىسىنىڭ قاڭتار ايىنداعى سۇحباتى جانە ۇلتتىق قۇرىلتايدىڭ ءۇشىنشى وتىرىسى 2024 جىلعا ارنالعان ىشكى ساياسات سالاسىنداعى جۇمىستىڭ كۇن ءتارتىبى مەن مازمۇنىن ايقىنداپ بەردى. جىل بويى قوعامدىق ماڭىزى زور ءبىرقاتار زاڭ ازىرلەندى جانە قابىلداندى. قوعامدىق پەتيسيالار ينستيتۋتى ىسكە قوسىلدى. تاۋەلسىز مەملەكەتتەر دوستاستىعى مەن ورتالىق ازيا ەلدەرىندە العاش رەت اتوم ەلەكتر ستانساسىن سالۋعا قاتىستى رەفەرەندۋم ءوتتى. رەفەرەندۋم وتكىزۋدى تالقىلاۋ ەڭ ۇزاق ساياسي ناۋقان بولدى. اۋىل اكىمدەرىنىڭ سايلاۋى جالعاسىن تاپتى. ونوماستيكا، ەسكەرتكىش جانە گەرالديكا، مەملەكەتتىك جانە قوعامدىق ناگرادا سالالارىن رەتكە كەلتىرۋ جۇمىسى باستالدى. الەۋمەتتىك-گۋمانيتارلىق سالاداعى مەملەكەتتىك باستامالار دايەكتى تۇردە جۇزەگە اسىرىلدى: «ۇلتتىق قور – بالالارعا» باعدارلاماسى، «جايلى مەكتەپ» ۇلتتىق جوباسى، مەكتەپتەردە تاربيە جۇمىسىنىڭ ءبىرىڭعاي باعدارلاماسى، جاس عالىمدارعا ارنالعان جاڭا گرانتتار مەن تاعىلىمدامالار، جۇمىسشى مامانداردىڭ مارتەبەسى مەن ابىروي-بەدەلىن كوتەرۋ.
جاڭا سىن-قاتەرلەرگە جاۋاپ
مەملەكەتتىك اپپارات سىن-قاتەرلەردى جانە سىناقتاردى ابىرويمەن ەڭسەردى. پرەزيدەنتتىڭ ساياساتى بۇرىن-سوڭدى بولماعان حالىقارالىق شيەلەنىس جاعدايىندا ەلىمىزدەگى بەيبىتشىلىك پەن كەلىسىمدى ساقتاۋعا، قازاقستاننىڭ ەگەمەندىگى مەن قاۋىپسىزدىگىن نىعايتۋعا ىقپال ەتتى. الاپات تاسقىن سالدارى قىسقا مەرزىمدە جويىلىپ، مەملەكەت بارلىق زارداپ شەككەن ازاماتتارعا اۋقىمدى كومەك كورسەتتى. ايەلدەر مەن بالالاردىڭ قۇقىقتارىن قورعاۋ، سونداي-اق بالالار اراسىنداعى سۋيسيدكە قارسى كۇرەستى ۇيلەستىرۋ ءۇشىن جۇيەلى شارالار قولعا الىندى.
جاڭا قوعامدىق ەتيكا
جاڭا قۇندىلىقتاردىڭ قالىپتاسۋ ۇدەرىسى جالعاستى. ادىلدىك، زاڭ مەن ءتارتىپ قاعيدالارى مەملەكەتتىك ورگانداردىڭ عانا ەمەس، بۇكىل قوعامنىڭ ۇستانىمىنا اينالدى. ازاماتتىق قوعام پرەزيدەنتتىڭ باستاماسىمەن قولعا الىنعان «تازا قازاقستان» جالپىۇلتتىق ناۋقانىنا، سونداي-اق تۇرمىستىق زورلىق-زومبىلىق، اگرەسسيا مەن ۆانداليزم، ناشاقورلىق، ويىنقۇمارلىق جانە ىسىراپشىلدىق سەكىلدى كەسەلدەرگە قارسى كۇرەسكە بەلسەندى ارالاستى. ادەپ جانە مىنەز-قۇلىق نورمالارىن ساقتاۋ حالىق قىزۋ تالقىلايتىن تاقىرىپقا اينالدى.
قوعامنىڭ جۇمىلا ءتۇسۋى
ءتۇرلى تاقىرىپقا بايلانىستى پىكىرتالاستارعا قاراماستان، جالپى بيلىك پەن قوعامنىڭ ەل بولاشاعىنا قاتىستى تۇسىنىگى مەن كوزقاراسى ورتاق. قازاقستاننىڭ ستراتەگيالىق زەرتتەۋلەر ينستيتۋتى جىل سوڭىندا وتكىزگەن ساۋالنامانىڭ قورىتىندىسىنا سايكەس، تۇرعىنداردىڭ 77،7 پايىزى مەملەكەتىمىزدىڭ دامۋ باعدارى دۇرىس دەپ ەسەپتەيدى. جۇرتتىڭ قولداۋى 2025 جىلى دا جالعاساتىن رەفورمالاردىڭ بەرىك تىرەگى بولماق.