ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ قارجى پيراميداسى ءۇشىن ءوزىن-وزى ورتەپ جىبەرگەن ايەلدىڭ وقيعاسىنا قاتىستى پىكىر ءبىلدىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
11 ساۋىردە ەلورداداعى ىشكى ىستەر مينيسترلىگى عيماراتىنىڭ الدىندا Mudabarah Capital قارجى پيراميداسىنان زارداپ شەككەن ايەل ءوز-وزىن ورتەپ جىبەردى. وعان العاشقى مەديسينالىق كومەك كورسەتىلدى جانە اۋرۋحاناعا جاتقىزىلدى.
«قۇقىق بۇزۋشىلاردىڭ ىس-ارەكەتىنەن شىعىنعا ۇشىراعان ادامدار ءتۇرلى پسيحوفيزيولوگيالىق قىسىمعا تۇسەدى. كەيبىرى بۇعان شىداي المايدى. وسىلايشا جابىرلەنۋشىلەردىڭ ءبىرى، مەنىڭ ويىمشا، تەرگەۋ ورگاندارىنا قىسىم كورسەتۋ ماقساتىندا وسى قادامعا باردى (ءوزىن-وزى ورتەدى – رەد.). وتتى ءسوندىرىپ ۇلگەردى، ءقازىر ول اۋرۋحانادا جاتىر جانە ومىرىنە ەش ءقاۋىپ جوق. مەندەگى بار اقپارات وسى»، - دەدى مارات قوجايەۆ ءماجىلىستىڭ جالپى وتىرىسىنان كەيىن تىلشىلەرگە بەرگەن سۇحباتىندا.
اتالعان قىلمىستىق ءىس بويىنشا 14 ادام جاۋاپقا تارتىلعان، ولاردىڭ التاۋى قاماۋدا وتىر. تەرگەۋ جۇمىستارى اياقتالۋعا جاقىن.
«بىرنەشە ادام ءۇيقاماقتا وتىر. ەكى ادام كەپىلمەن جانە بىرنەشەۋى ەشقايدا كەتپەۋ تۋرالى قولحاتپەن بوساتىلعان. مۇنداي بۇلتارتپاۋ شارالارىنىڭ جازالاۋ ەمەستىگىن ءتۇسىنۋ كەرەك. ول ءار ادامعا جەكە تاعايىندالادى، تەك ادام جاسىرىنىپ قالماۋى ءۇشىن، جاڭا قىلمىس جاساماۋى ءۇشىن جانە باسقا ادامداردى تەرگەۋگە كەدەرگى كەلتىرۋگە ۇگىتتەمەۋى ءۇشىن جاسالادى. بۇل ءالى جازا ەمەس. الايدا وسى قىلمىستىق ءىس بويىنشا جابىرلەنۋشىلەر كىمنىڭ قاماۋدا، كىمگە بۇلتارتپاۋ شارالارى قولدانىلۋى كەرەكتىگىن شەشىپ قويعان. وكىنىشكە قاراي، وسىنداي ەموسيالار بايقالادى، ءبىراق ءبىز بۇل شارالاردى زاڭناماعا سايكەس رەتتەۋىمىز كەرەك»، - دەدى م. قوجايەۆ.