«سامۇرىق-قازىنا» قورىنىڭ بەيىندى ەمەس اكتيۆتەرىنىڭ ءبارى جەكە مەنشىككە جانە حالىقتىق ءىرو-عا ءوتۋى كەرەك. بۇل تۋرالى پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىندا ايتتى.
«باستى ماقسات – اكتيۆتەردى باسقارۋ ءىسىنىڭ اشىقتىعىن جانە تيىمدىلىگىن بارىنشا ارتتىرۋ. «سامۇرىق-قازىنا» قورىنىڭ بەيىندى ەمەس اكتيۆتەرىنىڭ ءبارى جەكە مەنشىككە جانە حالىقتىق ءىرو-عا ءوتۋى كەرەك. ۇكىمەت بۇل جۇمىستى 2024 جىلدان باستاپ قولعا الادى. كەلەسى جىلى «Air Astana» كومپانياسى حالىقتىق ءىرو-عا شىعارىلادى. «QazaqGaz» كاسىپورنى دا وسى جۇمىسقا دايىندالۋى كەرەك. ءىرى كومپانيالارداعى مەملەكەت اكتيۆتەرى ساۋداعا شىعۋعا ءتيىس»، - دەدى مەملەكەت باسشىسى.
سونىمەن بىرگە، باسەكەلەستىكتى قورعاۋ جانە دامىتۋ اگەنتتىگى ۇكىمەتپەن بىرلەسىپ، نەگىزگى نارىقتاردى دەمونوپوليزاسيالاۋ ءۇشىن شارا قابىلداۋعا ءتيىس.
«ءبىز ساۋدا-ساتتىقتى وركەنيەتتى جولمەن جۇرگىزۋ ءۇشىن تاۋار بيرجالارىنىڭ جۇمىس ىستەۋىنە قولايلى جاعداي جاسادىق. الايدا رەتتەۋ جۇمىسىنىڭ تيىمدىلىگى تومەن بولعاندىقتان، بىرەۋلەردىڭ ىرقىنان شىقپايتىن تاۋار بيرجالارى پايدا بولدى. ولار باسەكەلەستىكتى جوياتىن، يمپورتتىڭ جانە ءونىمسىز دەلدالدىقتىڭ پايداسى ءۇشىن ساتىپ الۋ راسىمدەرىن اينالىپ وتەتىن ورىندارعا اينالدى. رەتتەۋ تالاپتارىن كۇشەيتىپ، ايتىلعان كەمشىلىكتەردەن تۇگەل ارىلۋ قاجەت»، - دەدى قاسىم-جومارت توقايەۆ.