تىكۇشاق ءازىربايجاننان قايتىپ كەلە جاتقان.
يران پرەزيدەنتى يبراگيم ءرايسيدى اكەتىپ بارا جاتقان مي-171 تىكۇشاعى اپاتقا ۇشىرادى، دەپ حابارلايدى Almaty-akshamy.kz
يراندىق جانە باسقا دا بۇقارالىق اقپارات قۇرالدارىنىڭ اپات جايلى، بورتتا بولعانداردىڭ جاعدايى تۋرالى اقپاراتى ءار الۋان. ءبىراق بولعان وقيعا جايلى العاشقى مالىمەتتەر اپاتتىڭ سەبەبى تۇماندى اۋا-رايىنان بولۋى مۇمكىن ەكەنىن كورسەتكەن.
بورتتا يراننىڭ سىرتقى ىستەر ءمينيسترى حوسەين امير ابدوللاحيان دا بولعان.
«يرنا» اقپارات اگەنتتىگى ۆيسە-پرەزيدەنت موحسەن ءمانسۋريدىڭ يبراگيم ءرايسيدىڭ قاسىنداعىلار اپاتتان كەيىن بىرنەشە رەت بايلانىسقا شىقتى دەگەنىن حابارلادى. ءمانسۋريدىڭ ايتۋىنشا، جويقىن اپات ەمەس.
«دەلەگاسيا ءۇش تىكۇشاققا مىنگەن. پرەزيدەنت مىنگەن تىكۇشاق پەن باسقالارىنىڭ اراسىندا بايلانىس جوعالىپ كەتكەن. سوسىن قالعان ەكى تىكۇشاق ىزدەۋگە كىرىسكەن. ەكيپاج مۇشەلەرى بايلانىسقا شىقتى، سوعان قاراعاندا، جويقىن اپات بولماعان. وقيعا ورنىنا اسكەرلەر مەن «قىزىل جارتى اي» قۇتقارۋ بريگادالارى اتتاندى»، دەدى موحسەن مانسۋري.